Sentensia dia 18 febrüari binidero

WILLEMSTAD.- Korte di promé instansia ayera a será  e kaso kruel di asesinato ku a  haña e nòmber Barí.

Ta trata di e kaso kaminda e  komersiante venezolano Angel Barios Rodriguez, a keda derá bibu, riba tereno di un finka na Choloma, den e periodo di 8 febrüari pa 30 di mart 2020.

Ministerio Públiko ta akusá un kantidat di 9  venezolano di ta involukrá den e kaso aki. E sospechoso prinsipal Mauricio Ordonez (21) nasé na Venezuela ku tabata traha pe víktima, kolektando sèn pa manda Venezuela, a bin ku e plan pa likidá e hòmber pasó e tabata debe mas di 13 mil florin.

Su kaso a keda trata apart na yanüari, debí na su seguridat, mirando ku el a basha abou riba su otro ko akusadonan.

Ordonez a duna deklarashonnan amplio na hustisia ku a kondusí na nan detenshon.

Tur kos a kuminsá na momento ku polis a deskubrí un outo na kandela riba Dam Pretu riba 9 di febrüari 2020.

Despues di un investigashon a resultá ku e outo tabata pertenesé na e víktima Barios.  Mas den oranan di anochi a drenta un informashon ku e víktima a disparsé.

Polis a skucha e señora ku ta traha na kas di e víktima ku a deklará ku e último bia el a tende Barios tabata diskutí  na telefòn ku su trahadó Mauricio riba pagamentu.

Ora e  víktima a sera telefòn, el a bisa e señora ku e no tin konfiansa den Maurcio pa motibu ku den pasado el a traha p’e kaba, pero despues  a kore kuné paso el a hòrt’e.

Aparte di e negoshi di kolekta sèn,  tambe Barios tabatin planiá pa lanta un restorant na Kòrsou.

Polis ku a kuminsá ku investigashon, a mira ku un hende a subi e kuenta bankario di e víktima e mesun un anochi  ku el a disparsé.

A resultá ku Ordonez ta esun ku a subi kuenta di e víktima via su token.

Polis a tene entrada hudisial na Ordonez su kas i a haña  e token di Banko Caribe di e víktima den su poder. Esei tabata sufisiente motibu pa detené.

Na polis el a duna vários deklarashon basa riba mentira, pero despues a disidí di basha bou bisa ku nan a sekuestrá e hòmber i tir’e den buraku bibu.

Aki el a basha bou nòmber di tur esnan ku a yud’é i a kondusí na tur su detenshon. El a bisa ku nan 5 a sekuestrá e hòmber promé na su kas, bai kuné na Finka na Choloma.

Un otro sospechoso ku yama Maikel ta esun ku a koba e buraku, pero despues ku nan a wòrdu detené, el a hui bai Venezuela.

Nan a obligá e víktima pa duna su number di kuenta i ora ku nan a wak, e tabatin solamente 1000 florin riba su kuenta bankario.

Esei a pone ku un di nan a bira furioso i a bisa pa tir’é den e buraku, tape e, paso el a  mira nan kara. Un di e ko akusadonan a bira furioso ora el a sa esaki i a rabia ku Ordonez i a asta bisa ku e ker tir’é.

Mayoria di e akusadonan a bisa ku nan mester a bai serka Ordonez pa regla papel di estadia seka Barios kontra pago. El a pasa buska tur, pero despues el a obligá nan pa partisipá den e sekuestro ku a resultá den e tragedia. Nan a  bisa di tin hopi miedu di Mauricio pasó e tin un rèkòrt kriminal na Venezuela di hendenan ku el a laga mata. E  otronan a ninga nan partisipashon i bisa ku nan no sa nada di e kaso. Hues a bisa ku e ta haña straño, pasóo na polis nan a deklará tur kos detayadamente i awor ta kambia di deklarashon. Hues ta haña kon tantu hòmber por tin miedu di e Ordonez di apénas 20 aña.

Fiskal a pidi 27 aña pa 5 di e akusadonan, un di nan el a pidi pa e keda apsolvé di kulpa, e sospechoso prinsipal a keda demandá na 18 aña pa su koperashon na hustisia i su otro ko akusado tambe na 18 aña.

Dia 18 di febrüari korte lo dikta sentensia.