WILLEMSTAD.-  Ayera polis a ordená un grupo grandi di hóben riba  baiskel ku a subi kaya pa bai kas.

E  tradishonal “ Tour de Mas” di e emisora radio mas 99.7 ayera mester a tuma lugá den kayanan di Kòrsou, pero manera tur hende  sa esei no por tabata e kaso pa motibu di e medidanan di COVID-19 ku ta asotá rònt mundu.

E hóbennan kisas ku gana pa tabatin e famoso ‘tour’ a traha nan propio grupo i subi kaya. Nan tabata na  vários parti di Kòrsou i tabata koriendo di formanan iresponsabel peligrando tráfiko. Hopi outomobilista tabata kuestioná e forma ku nan tabata kore baiskel riba karetera i naturalmente a mèldu polis.

Polis a  aktua inmediato i a topa nan na Brion Plein. E agentenan a splika e hóbennan ku pa kore den grupo grandi manera nan tabata, mester tin pèrmit i tambe mester tene kuenta ku e medidanan relashoná ku COVID-19.

P’esei polis a ordená nan pa plama fo’i otro i bai kas, sino nan akto lo tin konsekuensia.

E hóbennan a tende i sigui e òrdu di polis.