WILLEMSTAD.- Despues di kasi un luna ku tabatin mortonan tur dia a konsekuensia di COVID, porfin ayera no a registrá niun morto. Esaki sigur ta un notisia alentador huntu ku esei e sifranan di kasonan aktivo di kontagio i esnan positivo ku tambe ta bahando. For di 30 di mart, tur dia ku a sigui te ku ayera tabatin 1 òf mas hende ku a fayesé dor dje vírus di Corona.
Pero esei no ta kita ku sifra ku nos tin di registro Sivil ta mustra ku luna di aprel aki ku ta kore di 1e pa 29 tabatin un kantidat rèkòrt di 226 morto total. Un konteo ku nos a hasi for di dia 1e di aprel te ku 28 di aprel, tabatin alrededor di 71 morto a konsekuensia di COVID. Pues e sifra di 226 sigur a keda influensiá dor di e kantidat di hende ku a fayesé den luna di aprel aki a konsekuensia di COVID. Na 2020 e kantidat di mortonan den luna di aprel tabata 105, den 2019 esei tabata 121, i den 2018 tabata 112.
Pa loke ta trata sifranan di resultadonan di COVID-19 na Kòrsou ta indiká: kasonan positivo ta 19 for di 608 resultado di tèst ku a hasi, 97 kaso di hende ku a rekuperá, e total di kasonan aktivo ta 530.
Te ku ayera tardi tabatin 55 persona hospitalisá, di kua 28 ta risibí kuido intensivo. Ketu bai tin 4 persona di Kòrsou den hospital na Aruba den kuido intensivo. For di djárason 1 hende a fayesé i a bira e di 108 morto komo konsekuensia di Coronavirus.
Sifra di vakuna: total persona registrá ta 77.029; a risibí promé vakuna ta 71.871, a risibí di dos vakuna ta 22.696 i total di vakuna apliká ta 94.567.