WILLEMSTAD.- Djaweps anochi na The Movies Punda a tuma lugá e estreno dje dokumental ‘Ami ta Tumba’, un dokumental riba Festival di Tumba Hubenil.

Ku un durashon di mas o ménos 50 minüt e dokumental a repasá por parti e historia di Festival di Tumba Hubenil kuminsando for di inisio ku Koprokamu, bou di direkshon di Dr. Roy Heereveen i sra. Arlene Clements.

Den e dokumental a entrevista basta persona ku di un òf otro forma a duna sosten na e festival sea komo Rei òf Reina di Tumba Hubenil, kompositor, areglista i tambe dirigentenan dje organisashon.

Great pa por a mira tambe algun dje kantantenan ku no a gana pero ku awor ta e artistanan popular aki na Kòrsou manera, Roald, Danny Yanga, Ephrem J i Ivanhoe ‘Skuri’ Willems.

Un dokumental ku ta bale la pena keda presentá na skolnan di fundeshi pa dje forma ei sigui atraé mas hóben pa partisipá na Festival di Tumba Hubenil.