WILLEMSTAD.- Ayera porfin e struktura nobo di Girobank a bira konosí pa e trahadónan. Tabata alabes un dia difísil pasobra a bira konosí kua funshonnan ta keda eksistí i kua ta disparsé.

A pasa departamento pa departamento pa informá e trahadónan kon e struktura di nan departamento ta bira. Esaki a enserá ku awe vários trahadónan a haña sa tambe ku mester laga nan bai pasobra nan funshon ta stòp di eksistí.

Esaki a sòru pa momentonan doloroso i di tristesa.

Ta for di dos siman pasá gerensia di Girobank a saka oferta pa retiro boluntario. E trahadónan ku a haña sa awe ku nan funshon na e banko ta stòp di eksistí por hasi uso di e areglo di retiro boluntario ounke ku ainda no ta konosí ki areglo fiskal a logra haña pa e areglo di retiro.

E banko pa basta tempu kaba a anunsiá ku den kuadro pa sanea situashon mester redusí e kantidat di personal ku entre 60 pa 70 hende. Girobank ta bai hasi 5 aña bou di supervishon di Banko Sentral debí na problema ku solvabilidat di e banko, esta kapasidat pa e banko por kumpli ku su obligashonnan riba término largu.

Ya kaba a sera filialnan di e banko na Colon, Otrobanda i La Confiansa, Punda. Tambe Girobank a sera su úniko sukursal na Boneiru i no ta hasi  negoshi mas riba islanan BES.