WILLEMSTAD -. Segun Gibi Bacilio, presidente di Plataforma Sklabitut i Herensia di Sklabitut, awor e ora a yega ku gobièrnu di Kòrsou ta tuma un posishon firme. ‘Na mi opinion gobièrnu tin ku bisa Hulanda ku awor e tempu a yega pa pidi pordon pa nan ròl den komersio di sklabitut. Despues nos por kuminsá papia tokante pago di rekompensashon (‘herstelbetalingen’). ‘Bacilio ta reakshoná riba deklarashon di presidente di Parlamento di Sürnam ku algun dia pasa a bisa delegashon di parlamentarionan hulandes ku Hulanda no por tarda mas ku pidi pordon. Bacilio, komo presidente di e Plataforma, diferente bia a bisa kaba ku na su opinion Hulanda tin ku pidi pordon. ‘‘Hulanda a probechá hopi di komersio di sklabitut. Esaki presidente di Banko Sentral ‘De Nederlandsche Bank’ resientemente a atmití. Banko Sentral a pidi pordon. Segun nos awor ta e tempu ku Hulanda ta paga. Nos tin hopi proyektonan riba nivel sosial, edukashonal i di ekonomia ku nos por kuminsá pa invertí den nos komunidat, den nos pais. Pa asina nos por yega na mesun nivel ekonómiko di Hulanda.’ Segun Bacilio ta importante ku gobièrnu ta tuma inisiativa pa esaki. Plataforma Sklabitut i Herensia di Sklabitut ta lucha pa basta aña kaba. ‘Awor tin mas atenshon pa historia di sklabitut i e efektonan pa nos komunidat. Ku ta nifiká ku awor ta tempu pa gobièrnu ta tuma un posishon firme’, Bacilio a bisa.