WILLEMSTD -E barku “semisubmersible”, DCV Balder ku a ser konstruí na aña 1978 i ku na 2001 a wòrdu konbertí den un barku di konstrukshon pa laman di hopi profundidat a yega Kòrsou 11 di desèmber último. E barku aki ku kran grandi ariba ta nabegá bou di bandera Panameño. Riba 11 di desèmber el a mara na Caracasbaai ku asistensia di Kompania di Tou Kòrsou (KTK). Aki nan diferente piesa di barku a wòrdu hisá dor di DCV Balder for di e lancha H-407 pa pone abordo di e Balder. Riba 13 di desèmber 2021 e Balder a mara ku asistensia di KTK na e bui di St.Michielsbaai pa ehersé trabounan di bou di awa, manera na un di e chapaletanan bou di e barku. E trabounan aki a ser realisá dor di kontratistanan i supkontratistanan lokal. Riba 21 di desèmber 2021 e Balder a regresá ku asistensia di KTK Carcasbaai pa kontinuá ku trabounan di mantenshon i reparashon dor di entre otro Damen Ship Repair kaminda ainda diferente kompania lokal ta envolví den e proseso. Esaki sigur tin su impakto ekonómiko positivo pa Kòrsou. Pa e proyekto aki tambe e lancha H-407 ku ta nabegá bou di bandera Panameño ta envolví. E lancha aki a wòrdu di tou dor di e boto di tou Bylgia ku ta nabegá bou di bandera Hulandes.E boto di tou Bylgia i e lancha H-407 a yega Caracasbaai 1 di desèmber 2021.

Hotèlnan a ser okupá dor di tripulantenan ku a bin pa traha riba e barku, e tripulantenan aki ta hasi uso di transporte ku taksi diariamente i tambe laboratorionan lokal ta benefisiá kada momento ku tripulantenan tin ku hasi nan pruebanan pa por biaha. Laga nos no lubidá riba kompanianan ku ta hasi transporte di shushi,etc. E proyekto aki ta dura segun plan te ku fin di mart 2022.