WILLEMSTAD.- For di e luna aki, despues di un proyekto piloto kordiná ku ayudo di Kuerpo Polisial Kòrsou i Stichting Beheer ICT Rechtshandhaving den koperashon ku INSight Insurance Platform, agentenan polisial di forma digital por kontrolá prueba di seguro digital. Esaki entretantu mayoria kompania di seguro ta ofresé na nan klientenan. Durante di e periodo di implementashon, polis lo ekipá su mes ku aparato di skèn i un tim speshal di INSight lo sostené e agentenan na momentu di kontròl.

Entre tantu mayoria shofùr di outo tin akseso na nan karchi di seguro digital via nan telefòn selular. Polis por hasi kontròl hasiendo uso di e “validation-app” ku ta skèn e QR code ku tin riba e prueba di seguro.

Asina e proseso di balidashon lo ta efikas i e koperashon entre kompanianan di seguro i outoridatnan lo ta mas direkto.

E kompania di seguro ta traha e karchi digital i ta fásil pa ‘download’ esaki riba telefòn di e asegurado. Asta sin konekshon di Internet e karnèt digital ta aksesibel.

Aseguradonan ta wòrdu konsehá pa semper tin un vershon di print di e QR code pa si tin kualke motibu ku e telefòn no ta aksesibel na momentu di kontròl, semper polis por keda verifiká balides di e seguro.