Kòrsou den fase 2; no por detektá fuente kontagio

WILLEMSTAD.-Den un konferensha di prensa ekstraordinario premier Eugene Rhuggenaath huntu ku dr. Izzy Gerstenbluth a anunsiá ku Kòrsou ta den situashon di krísis pasobra e menasa di Covid-19 ta prevalesé ketu bai. Di forma serio i urgente a pidi empresanan i tur hende pa bai bek na loke nos a siña algun luna pasá esta di laba man konstantemente ku habon, no tosa habri etc.

Premier a indiká ku e prome paso ta di prevení. Mester bai bek na e punto di praktiká higiena tur momentu i tur kaminda. Un di e medidanan di mas importante ta pa mantené distansia i keda komportá pa asina nos komo pueblo por keda safe.

Epidiomólogo Gerstenbluth a indiká ku tur e kasonan di Covid ku a keda anunsiá últimamente ta kasonan importá. A trata nan isolá i asina nan no a bira un problema pa e komunidat aki. Sinembargo awor si tin kaso lokal anto loke ta pió ta ku no por detektá e fuente. Anto esei ta motibu pa tuma medida! Si no por detektá e fuente anto mester Sali for di e punto di bista ku por tin mas hende kontagiá.

Mas aleu el a indiká ku for di momentu ku a habri frontera a alerta ku mester tene kuenta ku e situashonnan aki ta presentá. Na Aruba por a nota ku manera a habri frontera mesora e kantidat di kasonan a oumentá. Hendenan lokal a bai Aruba i a balia, gosa i bai klupnan. Ta p’esei a tuma desishon pa sera frontera ku Aruba.

Dr. Gerstenbluth a anunsiá e fasenan di eskalashon.

Fase 0   ora tin kasonan importá so (den e kaso ei ta laga bida normal kuminsá bek)

Fase 1   bo sa ken e fuentenan, esei ta nifiká ku por kontené

Fase 2   tin kaso lokal i no por detektá  e fuente..Korsou ta einan!

Fase 3   tin mas klùster i no a keda na unu grupo so

Fase 4   transmishon lokal a bira asina tantu ku mester bai bek ‘lockdown’ ku medidanan severo

Kòrsou ta den fase 2. Den e fase aki mester tene hende paden i asina minimalisá ku ta plama e vírus. Pa e motibu ei mester stòp tur evento unda tin hopi hende. Importante ta pa tur hende tuma nan propio responsabilidat, si bo mira hopi hende na un sitio simplemente no bai einan.