WILLEMSTAD.- Dia Internashonal kontra Violensia, kontra Hende muhé a keda instituí dor di Nashonnan Uní, relashoná ku e echo ku dia 25 di novèmber 1960, 3 hende muhé aktivista polítiko a ser asesiná na República Dominicana.

Violensia kontra di hende muhé ta sosodé lástimamente diariamente rònt mundu. Violensia ta un estorbo grandi pa e hende muhé por funshoná na un manera bon, tantu na kas komo den sosiedat. Nos por agregá tambe violashon di derechinan di hende muhé i mucha muhé riba salú, seguridat i integridat korporal. No ta trata únikamente di e formanan di violensia tradishonal, sino tambe di formanan spesífiko di violensia manera violensia kontra di refugiadonan femenino, trafikashon di hende muhé, vengansa di honor, violensia seksual i violensia relashonal.

UNESCO for di 2009 a tuma riba su mes pa pone atenshon riba e dia akí bou di e komunidat mundial, a traves di e kampaña yamá “Orange the World” esta “Hasi Mundu Oraño”.

Ya pa algun aña kaba, Soroptimist International, un grupo di servisio konsistiendo di mas o ménos 75.000 hende muhé rònt mundu, ku e meta pa drecha posishon di e hende muhé ta sostené e akshon aki. Ta konosí tambe ku for di komienso di e pandemia, violensia kontra di hende muhé a oumentá seriamente rònt mundu. Diferente organisashon mundialmente a bati bèl, i tin vários investigashon andando pa sa mas tokante e problema aki, pa por kombatí e fenómeno akí mas dirigí.

Diferente organisashon den nos komunidat a kuminsá yuda den e esfuerso pa konsientisá otro nan riba e tema aki. Manera media/ korantnan lokal, MCB ku lus oraṅo na su edifisio na Rooi Catootje i CPA ku lus oraño na brùg di ponton.

Soroptimist Club Curaçao ta usa nos karawara spañó den forma di un flor, ku nos mes a traha, pa repartí bou di komunidat, instansianan lokal, i skolnan, pa konsientisashon durante e periodo di 26 di novèmber pa 10 di desèmber.

Abo tambe por yuda nos sostené e kousa dor di bisti/o usa algu oraño durante e periodo di 26 di novèmber pa 10 desèmber.

Huntu so nos por kombatí e fenómeno aki.