Silvia Prince

Botanical Scents òf Nature Curaçao NV

...Tradishon na Kòrsou ta ku ora 12 or di anochi 31 di desèmber ta batiendo, mester laba kas, mester sensia, ta kome 12 drùif, mester tin sèn den pòtmòni i asina nos por menta hopi mas. Produktonan di laba kas tin hopi pero awe nos tin unu spesial, Botanical Scents òf Nature Curaçao NV ta trese nan awa di laba kas ku tambe bo por usa pa baña kuné. Silvia Prince a konta kuantu kos por hasi den fin di aña, den kuadro di nos kerensia.

Silvia; Nos ta sòru pa tur aña tin e sensianan dushi ku nos por bai bèk for antaño te awor, awa di laba kas, spray i piedranan ku ta pas ku kambio di aña i belanan. E aña aki mas tantu klientenan ta buskando spray. Nos ta usa zetanan di esential ku ta resetanan familiar ku tin hopi éksito i di nan ta traha e spray. Ta djis spray den kas, sea pino mandarina i menta i hopi mas.

Promé ku tiru....

Señora Silvia ta rekomendá promé ku tiru tin di limpia kas. Ta kuminsá bari di patras bai dilanti i mòp di patras bai dilanti. Usa amoniak pa saka tur kos ku tabata negativo pa nos mes. Kada hende tin kosnan ku nan no gusta ku a bai den aña. I laba di dilanti bai patras ku e awa dushi. Por ta awa di rosa, shete sorto, mandarina, lavender ku nan ta trata di esential oils. Shete sorto i rosa ta esun konosí i último añanan ta mandarina ku ta hopi bon pa éksito, prosperidat i poder mental. Loke bo pensa ta pasa tambe i p’esei mandarina. Rosa ta pa suerte, amor i salú.

Ora ta laba kas por meskla e rosa i mandarina i lavender. No ta rekomendabel pa meskla e shete sorto pasobra den dje tin shete diferente fragansia kaba. Nos ta traha e awa di esensial oils i kuné mes ta baña i limpia. No mester saka sèn pa kumpra otro awa pero ta un preis ta paga i ta usa e mesun pa laba kas i baña.

Sekreto di famia...

Na Botanical Scents nan mes ta traha nan propio awa. Sra. Silvia a splika Djasabra ku esaki ta nan sekreto di famia. I nan tin 16 aña ta hasié i tur aña ta traha mas i tur aña e hendenan ta bin bèk, Nan awa ta trahá sistema bieu i trahá ku esensial oil ku ta karu pero e ta bale la pena. Sra. Silvia su yu muhé ta esun ku a siña mas den e materia aki, i sra. Silvia tambe a duik den dje, E ta gusta trabou di laboratorio. El a gust’é for di chikí i gusta hasi eksperimento. I si e tabatin mas tempu e lo a traha asta shampu pero a base natural. I esun ku bishitá e negoshi aki i ke konseho, Sra. Silvia tei kla pa duna esaki.

Sensia promé i despues di tiru...

Ora ke huma kas promé ku tiru ta bon pa kuminsá tambe promé ku tiru, segun Sra. Silvia. Tin hende ta kuminsá for di 11’or i esnan ku ta pasa aña na kas ta bon pa e kas ta na huma ora tiru bati tambe. Usa shete diferente sensia. Por usa shete sorto pero e ta rekomendá pa usa shete diferente sensia i nan mes meskla esaki i bash’é poko poko. Por usa manera kopal, mandarina, sensia fini, Palo Santo, tur un tiki huntu ku tres rei i e ta bira algu hopi dushi. I sensia tambe tin 2 manera. E ta tuma mas tempu si, Kue sage pone riba e karbon i pasa rònt di patras bai dilanti i hasi orashon i despues pone mei mei di kas i despues page. I sera bentana pa e huma keda paden i despues habri bentana pa e huma bai. I e sensia dushi ta kana di dilanti bai patras. Si usa e palu di sage por sendé na stof na e palu mes i drei e rònt bo kurpa i di bo famia.

Hasi orashon miéntras huma ta bai laria...

Ora nos tende esakinan, tin hende lo bisa ta kos superstisioso. Pa Sra. Silvia a bisa ku e ta respetá kada hende su pensamentu. Esakinan ta parti di ritual i ántes kada hende ta hasi nan ritual, pensa pa nan mes i e ritual tin su nifikashon. Bo tin di pensa positivo i esei ta parti di bo ritual. No por bisa sensia ta ko'i kèns pasobra den misa tambe ta usa sensia. Ora bo ta hasi orashon hasié segun e sensia ta bai laria.

Banda ku e sensiamentu i labamentu di kas ku awa i produktonan spesial ta fin di aña, tambe ta hasié despues di e temporada di karnaval segun Sra. Silvia. El a splika ku temporada di resurekshon hende ta huma i laba kas ta pasobra bo ta apstené bo mes na komementu i bebementu i ta hasi hopi orashon. I den e temporada ei ta usa mas awa bendita. Un biaha pa aña no ta malu pa hende sensia. Tin hende ta usa nan palunan di sensia, pero un sensia grandi tambe ta hasi efekto.

Sensia bo kas....

Tin hende ta sensia un biaha pa siman i nan mes por traha nan propio sensia dor di meskla por ehèmpel Mira ku ta masha gustá  huntu ku otronan i huma kas. Na Kòrsou último tempunan ta usa hopi e sage. Sage ta klara bo medio ambiente, Sra. Silvia a splika.

Piedra jade pa 2018

Hende ta gusta nan tradishon di kambio di aña. Pero iluminashon tambe ta importante. Iluminá bo kas promé ku tiru. Sende belanan di lus òf kualke lus pa asina tin iluminashon durante di aña. E ta yuda bo menta i tur kos. Pone belanan ku ta hole i sinti bu bon. Hasi orashon i pensa positivo. Tin hende ta tambe ta skohe sierto koló di paña pa bista na kambio di aña. Tur esaki ta hende su kerensia. Por ehèmpel 2018 ta aña di kachó i ta bai ku e piedra jade. Ta e piedra bèrdè di chines. Tin hende ta gusta piedra pa kambio di aña.