Kuida Kurpa, un ekspreshon asina usual na nos idioma Papiamentu ku ta wòrdu usá diariamente dor di nos tur na momento ku nos kier ekspresá nos mes ku otro. Sinembargo bo a yega di puntra bo mes, kiko bo kiermen or abo deseá un otro pa Kuida su Kurpa òf kon abo por Kuida bo Kurpa mas mihó?

Programa Kuida Kurpa, ta enfoká riba duna informashon, splikashon I tips riba e diferente áreanan relevante ku nos por Kuida Kurpa pa nos mes, I siña tur esnan rondó di nos pa bira mas konsiente kon nan tambe por kuida nan mes mas mihó.

Pa luna di Aprel nos lo enfoká riba e aspekto di Kuida bo Físiko

Kuida bo físiko no kiermen  solamente, e ousensia di malesa for di den bo kurpa, pero mas bien  hiba un bida kaminda bo ta skohe konsientemente pa mantené bo salu, evitá malesa I situashonnan ku por kousa problema pa bo bienestar. En general hiba un manera di biba kaminda bo kurpa, mente I spiritu ta den balansa.

Faktornan ku ta influensia nos bienestar físiko tin di aber ku, 1 malesanan ku nos por a heredá, 2 e ambiente ku bo ta biba aden, 3 e manera kon bo ta hiba bo bida, 4 bo oportunidatnan na akseso pa kuida médiko,  I 5 bo posibilidatnan ekonómiko, I posibilidatnan kubo Seguro ta ofresé.

Pakiko kuida bo físiko?

Manera ku tur kos den bida, mantenshon general ta a forma pa garantisá probecho largu I bon. Den e kaso di bo físiko, tuna tempu I hinka energia den kuida bo físiko ta duna benefishinan a korto plaso manera mas energia I grasia durante dia pa por logra bo metanan, I a largo plaso ta duna bo un chèns mas grandi di bo yega un edat avansá, ku un kalidat di bida haltu.

Tips pa Kuida bo fisko

Pone atenshon na lokual bo ta kome I bebe, no mester tene diet, simplemente mester kome saludabel!

Kuminsá move! Buska kualkier esküs pa por move, kana, baila, landa, tuma trapi na lugá di usa lift. Kualkier forma di moveshon, asta na un kantidat limitá basta ta regular nos kurpa ta agradesido di risibié.

Bebe awa, bo kurpa mester di dje manera ku un outo mester di gasolin òf diesel pa sigui kore, sin awa nos kurpa, nos mente, hinter nos sistema ta “jam”!

Duna bo kurpa sosiegu, tuma un pouze ku regularidat or abo ta bezig hinter dia, I anochi sòru di drumi sufisiente pa bo kurpa por deskansá kompleto.

Tipnan ariba menshoná ta nada nobo pa nos, lo bo pensa or abo lesa nan. Sinembargo bo a para ketu, ku pa simpel ku nan ta, aplika nan tur dia di nobo ta un reto grandi? E reto pa logra e kambio ta sinta den tin e disiplina pa tin konsistensia, akinan ta kaminda e yabi ta sinta!

Algun teps mas ku por duna oportunidatnan nobo pa kuida bo físiko;

Apliká un bon balansa entre bo kas I bo trabou

Mantené un bon higiena dental, skeiru bo boka tur dia i kuida bo boka tambe!

Hasi bo kontrolnan di kurpa manera midi suku, preshon I bo peso, regular

Protehá bo kueru kontra di solo, I usa un krema anti solo

Probechá di oportunidatnan pa prevenshon ku ta eksistí hoy en dia pa tur tipo di malesa.

Pa mas informashon general di Kuida Kurpa, òf pa hasi pregunta, libremente aserka nos via di email kuidakurpa@gmail.com, of kontakt nos via Instagram kuidakurpa.cw of facebook kuidakurpa.cw

Semper kòrda di Kuida Kurpa!