Kuida Kurpa, un ekspreshon asina usual na nos idioma Papiamentu ku ta wordu usá diariamente dor di nos tur na momento ku nos kier ekspresá nos mes ku otro. Sinembargo bo a yega di puntra bo mes, kiko bo kiermen or abo deseá un otro pa Kuida su Kurpa òf kon abo por Kuida bo Kurpa mas mihó?

Programa Kuida Kurpa, ta enfoká riba duna informashon, splikashon I tips riba e diferente áreanan relevante ku nos por Kuida Kurpa pa nos mes, I siña tur esnan rondó di nos pa bira mas konsiente kon nan tambe por kuida nan mes mas mihó.

Pa luna di Aprel nos ta enfoká riba e aspekto di Kuida bo Físiko

Kuida bo físiko no kiermen  solamente, e ousensia di malesa for di den bo kurpa, pero mas bien  hiba un bida kaminda bo ta skohe konsientemente pa mantené bo salu, evitá malesa I situashonnan ku por kousa problema pa bo bienestar. En general hiba un manera di biba kaminda bo kurpa, mente I spiritu ta den balansa.

Stress ta un di e faktornan di mas grandi ku un impakto negativo riba nos bienestar, bo tabata sa esaki?

Abo sa kiko ta stress?

Stress ta un reakshon di nos kurpa na momento ku nos mente, kurason òf kurpa físiko ta sinti preshon! Un tiki stress por ta algu positivo pasombra e ta motivá nos ta logra un meta. Hopi stress, òf di mas stress, voral pa un periodo largu no ta bon, I ta hasi nos malu den tur sentido di palabra!

Kiko ta e kousanan mas grandi ku ta okashoná di mas stress den nos kurpa?

Ta bou di preshon grandi pa hopi tempu.

Dil ku kambionan grandi I inesperá

Perde kontrol riba resultado di un situashon òf desishon

Inseguridat den bida

Formanan ku stress por manifestá den nos físiko ta:

En general

Problema ku kurason, preshon haltu, suku, depreshon, ansiedat , kansansio ku no kier bai, AO haltu, I vários maneranan mas.

Pero tambe hopi spesífiko dor di kousa por ehèmpel:

Acne, pèshi den kara of na un parti di bo kurpa manera bo lomba

Dolo di kabes severo

Dolo di barika, manera barika sera of diarea

Soda hopi, un grupo chikitu di persona manera nan hansha, bira nervioso nan ta kuminsá soda, na bon Papiamentu nos ta bisa nan ta keda papa soda!

Maneranan pa surpasá e stress den bo bida por ta:

Dor di aseptá ku stress ta parti normal di tur hende su bida, I ku nos mester move pa pasa dor di dje

Duna bo mes e tempu pa hasi esaki

Kuminsá chikitu, stap pa stap pa kue bo rumbo deseá

Buska yudansa den e área ku bo mester òf kier

Persistí, no give up, si awe no a bai manera bo kier, kuminsá di nobo mayan

Tips ku ta yuda baha bo stress ta

Brasa otro!  Kalor humano por hasi milager manera nan ta bisa.

Si bo ta un persona ku ta gusta animal I bo tin bo mes bestia di kas, hasi wega ku bo kachó òf kualkier otro bestia kubo tin na kas, ta un otro manera pa relahá I baha stress.

Mindfulness, un palabra na ingles ku ta deskribí e arte di hasi un kos pareu, I or abo hasié, enfoká riba un solo aktividat I kon bo ta sinti bo den e momento ei enbes di pensa òf hasi 10.000 mil kos pareu.

Siña bisa NO, ku mas frekuensia!

Kou bals! Tin hende ta hura ku kou un pida bals ta yuda relahá.

Bebe vitamina òf suplemento. Tin vários suplemento riba merkado ku ta kombatí stress òf yuda relahá, konsulta bo dòkter di kas òf botikario pa guia abo den esaki.

Pa informashon tokante di duna charla òf kurso di Kuida Kurpa, òf kualkier pregunta general, libremente aserka nos via di email kuidakurpa@gmail.com.

Semper kòrda di Kuida Kurpa!