WILLEMSTAD.- Aworakí mas ku nunka Kòrsou ta bai tin mester di su mihó hendenan pa sirbi e pueblo, hendenan ku eksperensia pero tambe hendenan ku ideanan inovativo i kreativo pa saka e pais aki dilanti. Nos no por sigui den e situashon aktual unda polítika a para bira manera un guera, komo sifuera ku dirigentenan ta enemigu di otro. No por sigui asina. Asina èks Promé Minister sra. Emily de Jongh-Elhage a deklará na EXTRA a base di un kòmbersashon ku ta sirkulando riba medionan sosial.

Segun sra. de Jongh-Elhage, último tempu tin hende den komunidat ku ta aserk’é den forma informal i ta puntra ta pa ken lo mester vota. Pero e na su turno e ta puntra hendenan pa ken nan ke vota, i riba nan kontesta e ta bisa nan pa “bai pe”. Esei el a hasi den kaso di un persona ku a referí na VISHON, pero tambe otro partidonan. Personalmente e ta kere ku pais ta bon sirbí den un kombinashon di hendenan ku eksperensia di un banda, i di otro banda ku personanan ku ideanan nobo, inovativo i kreativo.

Es mas, e realidat ta ku elekshon lo ser disidí entre 15 partido, i probablemente niun di nan lo haña 11 asiento pa por goberná nan so. Pues tin di ban pa un kombinashon di eksperensia i ideanan inovativo pa asina saka Kòrsou for di loke e ta aden awor i den futuro.

Den e elekshon aki mester evitá di bai tras di gritunan emoshonal, sino ban pa kosnan rashonal, ya ku e pueblo aki tin sufisiente n’e situashon di strès ku el a bin ta biba bou di dje. Pueblo tin sufisiente na e pandemia di COVID-19 i su konsekuensianan. Pues ta momentu pa pone kosnan den balansa. “Kòrsou ta sangrando i nos no por permití di bai mas abou”, asina e èks lider polítiko a remarká.

Pero e ke keda positivo, i ta mas ku tempu pa kambia e direkshon ku pais ta bayendo. Manera kosnan ta aktualmente no por sigui!

E tin di enfatisá ku den polítika nos no por ta enemigu di otro, nos por diferensiá di opinion, pero pais no ta sirbí ku enemistat. Si enberdat nos ta stima Kòrsou nos tin di wak kiko ta kumbiní pueblo. Den Karibe no tin un isla igual ku Kòrsou, pero nos no ta lat pa mantené e direkshon korekto, apesar dje difikultatnan ku por surgi na kaminda.