Kuminsando 7or di anochi ...

WILLEMSTAD.- E tradishon di tur 31 di desèmber e aña akí lo konta ku un variashon musikal amplio. ‘Ban Tende Tiru den Union’, organisá pa Sektor di Kultura manera ta kustumber ta tuma lugá riba Plasa Brion kuminsando 7or di anochi.

E programa ta kuminsá ku Grupo di Kanto Hóben Journey of Faith ku lo ta enkargá ku kanto di Himno di Kòrsou. Lo sigui un presentashon Journey of Faith. Despues ta sigui presentashon di grupo di perkushon di mucha, Viva Kids, grupo di baile D’art, Grupo di Aguinaldo Los Paranderos i grupo rítmiko Hóben na Timon.

Despues dje promé parti di presentashon lo tuma lugá e ritual di fin di aña ku ta bula sensia/kandela.

E evento ta kontinuá ku presentashon di grupo spiritual di Raimy Juliet, Zion, siguí pa grupo di tambú Ruta, banda di kòmbèk Sabor Original – S.O. i grupo EMMAW, komo grupo di urban.

Durante dje anochi dj Argenis Huerta lo ta enkargá ku animashon.

E parti ofisial lo konta ku mensahe di Minister di ESKD, Sr. Sithree van Heydoorn, mensahe di Promé Minister, Sr. Gilmar Pisas i mensahe spiritual di Obispu di Willemstad, Monseñor Luis Antonio Secco.

Lo sigui ku e video di ‘countdown’ ku bendishon di Monseñor Luis Antonio Secco. Despues di tiru lo tin presentashon di Grupo Limania i Orkesta di Borrel Dopwell & Friends. Ban Tende Tiru den Union riba Plasa Brion mañan anochi.