Sylvia Prince Mercera

Botanical Scents òf Nature

 

2019 un aña poko difísil pa hopi hende i 2020 mester bira un aña ku nos lo superá e kosnan ku a bai ménos bon. I Sylvia Prince Mercera di Botanical Scents òf Nature tin for di kos pa sensia kas, baño, bela pero tambe diferente asesorio pa nos bisti i yama kos bon so pa nos kurpa. Holó i kolonan diferente den 2020.

Kolonan i holónan pa fin di aña....

E tradishon ku ya a bira nos kustumber.  Sylvia a konta ku pa e fin di aña aki e kolonan preferí den 2020 ta plateá, blou; semper wak pa bo tin algu blou den bo surtido di kolonan pa aña nobo i sierto hende por kumins’é ku blanku, e hendenan ku mester di mas purifikashon i e kolo kòrá i hel no por keda afó. Botanicals Scents òf Nature ta konosí pa su belanan. Pa loke ta bela, Sylvia a menshoná e bela bèrdè ku holó di pino no por falta. Pino semper ta esun ku ta trese abundansia, fortuna. Ta bo mes mester pensa mentalmente pa kos positivo ta ku bo. E aña aki tin algun bela ku ta hole manera rosa bai den turkuas. Esei ta e bela ‘celebration’. I e bela kòrá, bèrdè, plata i oro pa fin di aña. Plata i oro semper ta nifiká fortuna, finansa pa kosnan por drecha. “Nos no mester ta mionario pero nos ke pa nos kosnan kore nechi”, Sylvia a opservá.

Kuminsá 2020 mihó.....

2019 pa Sylvia tabata un aña ku hopi reto, no fásil i un aña ku tabatin su kosnan bon pero kosnan fastioso mei mei. Esei semper bo ta haña ora e siklo ta kambia. Tin kosnan bon a pasa si, pero e kosnan fèrfelu a dominá poko i mester tira nan tras di lomba. Kaminda mira ku tin un kapítulo ku a pasa i bo no a gusta, mihó ser’é i kuminsá 2020 mihó.

Laga nos bai sensia i laba kas.....

E tradishon di tur aña ta ku promé ku aña nobo mes yega, asta for di Pasku mester kuminsá limpia kas, limpia bo oura i hasi bo mes tambe limpi. Kuminsá pensa kiko kambia na bo mes. Limpia e kas ku amoniak di patras bai dilanti pa saka tur loke ta mira ku a opstakulisá entrada bon. Semper di patras bai dilanti Sylvia a enfatisá. Despues sensia kas manera ku Benzu, Ambar, Sage i esei ta saka tur sushi tambe di patras bai dilanti. Bentana nan e ora ei mester ta habri pa tur e energia malu sali. Te na ora lag'é bentana i portanan será, asina kaba di sensia, habri kas mesora pa tur e huma sali for di e kas. Preferibel nan sali bai pabou i no pariba. Bentana di pariba si tene será i habri esun pabou pa  e huma bai pabou. Despues limpia e kas ku un bon awa traha, E aña aki buska e awa di buda pa limpia

di patras bai dilanti ora kaba ku e amoniak i sensia. Den e awa di amoniak mes ta basha e buda. Ora ta kana den kas, hasiendo e limpiesa aki, kana manera un oloshi pero kontrali i ora kaba ku tur esei ta bai hasi e parti dushi. Sensia kas ku e sensia dushi. Promé ku hasié, pasa awa dushi traha di rosa, lavender, 7 sorto, mandarina. Fin aña tur hende ta loko ku mandarina. I despues di esaki ta sensia kas. E bon sensia dushi ta 7 sorto ku ta tradishon na Kòrsou, tin tambe copal, sensia spesial Botanicals ta traha ku 7 pida kos pero no e 7 sorto. E tin copal, 3 rei, 7 potensia, kreinagel, laurel, rósamarein, i un mira. I asina hasié un 7 diferente kos,pero ku algu ku nan mes a traha. Sylvia a bisa ku nan ta konsehá e hendenan pa traha e potensia ku nan mes ta traha.

I ora di sensia dushi ta kana di dilanti bai patras. I 1 di yanüari bolbe sende e sensia ei atrobe pa yama aña nobo aden. Hopi hende ta sensia promé nan sali kas pero ora yega kas bek nan no a sensia. Mester sensia pa yama aña nobo bon bini pa e trese e mihó kosnan. I pa loke ta e awanan Sylvia a menshoná awa di rosa, awa di amor. I nan awanan semper ta traha ku zeta di esensia i por baña i laba kas ku nan. Ta nan mes ta traha nan. Tin awa di lavender, awa di 7 sorto, awa di mandarina.

Piedranan spesial pa fin di aña...

Sylvia a sigui konta nos di e piedranan pa fin di aña. Lapis Lazul i Pirit. Pirit ta un piedra plateá i ta bria, Por traha e piedranan ei den armbant i kadena pa bisti. Ta bon piedra pa bisti. Pirit ta spesial pa finansa i lapiz Lazul ta pa salu i amor. E piedranan aki ta disponibel na Botanicals i nan mes ta traha nan pa e kliente den armbant i kadena i por usa na piedra mes tambe.

Aña 2020 ta aña di raton di oro....

I banda di tur e tradishon ku Botanical Scents òf Nature ta ofresé tur aña, tambe e aña aki nan tin algun asesorio pa bisti. Sylvia a mustra nos brelnan i kosnan pa kabei ku 2020 ariba. 2019 ta tira kos malu afó i kuminsá 2020 bon. Ta un aña di raton. E raton di oro. Ta un aña ku por tin hopi frikshon pero e raton di oro ei ta drecha kos. I ora e kos drecha e ta tapa e kosnan malu. E oro ta pa tapa e frikshon. Aña di raton ta kuminsá na febrüari. I p'esei ora kuminsá aña buska e raton di oro pa kuminsá aña nobo. I esei tambe ta parti ku Botanicals ta bende.

Laga 2020 habri bu ku lus....

I fin di aña mester sende hopi bela. Bela di kolo. Preferibel bèrdè, hel kòrá, blanku, buska 7 kolo di bela pa sende i ora aña ta habri ku kas ta iluminá, lus ta trese amor, pas i tur kos i tambe speransa. Kaminda tin lus no tin nada malu. I den e belanan tin esun asta ku 2020 skibi den dje.

Mensahe...

Pa 2020 Sylvia ta bisa ku nos tur mester habri pa kambia. Nos mester ta habri i mester ta kambio positivo, pone nos focus riba e kambionan positivo ku ta bini. I kambio ta kosnan ku hopi hende ta bringa pero kambio ta bin i ta kosnan positivo.

Orario...

Mayan dia 29 nan ta habri di 9 or mainta te 6 or di atardi. Djaluna dia 30 di 8or mainta pa 8 or anochi i dia 31 nan ta habri 8 or mainta pa 5 or atardi. I kòrda pone frutanan riba mesa pa kambio di aña.