WILLEMSTAD.- Aña 2021 tabata un aña difísil pa komunidat kompletu. Aki na Kòrsou hopi famia a pèrdè trabou, pèrdè kas miéntras ku hopi kabes di kas a keda sin por sòru pa nan famia debidamente. Esaki sin lubidá e echo ku famianan a pasa dia sin algu pa alimentá nan mes. Nos aki na EXTRA ta Bendishoná di por a keda ku nos trabou apesar di tur kontratempu.

EXTRA su tim di fotógrafonan ku ta eksperensiá hopi situashon ménos agradabel riba kaya, a bini ku un inisiativa bunita pa yuda nos rumannan den nesesidat i esaki huntu ku komunidat.

E idea ta, ku entrante awe te ku djadumingu 19 di desèmber, tur trahadó, lektor i klientenan di Korant EXTRA por trese nan komestibel. Nos a pone buzon/kaha na entrada di ofisina di EXTRA na Rector Zwijssentraat 24 kaminda por depositá e komestibelnan.

Aparte di esaki, personanan, kompania òf negoshinan ku tambe ke koperá ku e proyekto aki, por tuma kontakto ku nos libramente pa mas informashon òf si ke pa nos mes pasa buska e komestibelnan. Por trese tur loke ta kuminda di bleki, aros, hariña, bonchi, buskuchi etc., i tur loke por harma un pakete kuné pa asina hasi un famia felis.

Nos lo harma e paketenan i entregá nan debidamente na famianan ménos pudiente den e siman di Pasku di Nasementu.

Mas komestibel nos haña, mas famia nos por hasi kontentu den diferente bario. Nos ta konta ku bo(so) koperashon pa hasi e proyekto bunita aki realidat. Pa mas informashon, por tuma kontakto ku number di telefòn: 522-9378 òf 523-6404.