WILLEMSTAD.- Un banda konsistiendo por kompleto di músikonan kubano bibá na Kòrsou, djadumingu 17 di ougùstùs awor, na Katedral di Sumpiña lo rindi un homenahe na e kantante, kompositor, aktris i empresario Gloria Estefan, un strea mundial ku tambe originalmente a bini di Cuba bai Merka. A plania pa e konsierto mes kuminsá atardi mitar di 7 i for di mitar di 6 e portanan ta habri.

Lider di banda, Ernesto Paz, ta konta ku ora ta referí na artista grandi di Cuba por lo general ta papia di streanan manera Celia Cruz. Pero di e moda ei no ta duna honor na otronan ku den transkurso di aña despues tambe tabatin nan méritonan. Kumpliendo ku un públiko mas hóben, nan komo músiko a kai riba e idea pa traha un programa ku obranan maestral di un otro gran artista, pero di poko mas resien, esta Gloria Estefan. Segun e, no ta trata solamente di dje komo kantante. Gloria ku su kasá, Emilio Estefan, a lanta un imperio di músika ku ta sólido manera un baranka. Gloria semper a sostené e komunidat kubano na i rondó di Miami. Te awe un fundashon ku ta karga su nòmber ta hasi trabou di karidat.

Anto ora e tabata di biahe esei e tabata hasi huntu ku su famia, pasobra e ta duna gran balor na un bida di famia.

Bo mester nifiká algu si bo por bisa ku bo tin 8 Grammy Awards riba bo nòmber, aparte di e Presidential Medal of Freedom, ku bo ta riba e lista di e 100 artistanan mas eksitoso i ku bo a bende mas ku 100 mion disko. Su triunfo a kue spit na 1985 ku e hit mundial ‘Conga’ komo kantante di Miami Sound Machine. Despues e hitnan tabata sigui, unu tras di otro. P’esei mester a hasi un selekshon for di e lista largu di piesa. Pa e homenahe a prepará un repertorio mas tantu di piesanan ku el a graba for di 1994 bin ariba, hopi be na Spañó, entre kua for di e diskonan ‘Mi Tierra’ i ‘Abriendo Puertas’.

E anochi akí e bahista, Cubano Ernesto Paz, lo ta kompañá pa su kompatriotanan Roselín Bey (perkushon i koro), Elena Manelain (flouta, perkushon i koro), Jeidys Cabrera (kantante prinsipal), Roque Robledo (guitara akústiko), Igort Rivas (tròmpèt) i Norger Velasquez (perkushon i baile). Karchi na rason di 65 florin (37 US$) pa persona ta optenibel na Zumpiña Shop, Landhuis Bloemhof i Mensing’s Caminada.