WILLEMSTAD.- Banko Sentral di Kòrsou i St. Maarten a disidí ku lo no but klientenan di Girobank, dado kaso ku nan disidí di likidá nan debe/fiansa den un tiru. Esei EXTRA por a komprondé for di kòmbersashon ku un representante di Banko Sentral ayera. Manera EXTRA a informá den nos edishon di ayera, komo resultado di henter e situashon ku a surgi ku Girobank, di su parti Banko Sentral a hasi un rekuento i duna splikashon riba e preguntanan mas frekuente bou di esnan ku tin nan plaka aki i a bin ta hasi uso dje servisionan di e banko menshoná.

Manera ta konosí kaba, kada kliente tin akseso na un máksimo di 10 mil florin, miéntras ku e sobrá dje suma ku e tin por lo pronto ta keda konhelá. Pero tin hendenan ku tin hopi pregunta rondó dje kantidat di servisionan ku Girobank ta(bata) ofresé.

I un di e preguntanan ku a surgi, i riba kual Banko Sentral a duna lo siguiente komo kontesta:

Mi tin ku paga un but si mi sera òf kaba di paga mi fiansa trempan?

Prosedernan di Girobank NV ta stipulá ku mester paga un but si bo kaba di paga bo fiansa trempan. Konsiderando e sirkunstansianan Girobank NV ta dispuesto pa no kobra e but.

Komo ku e palabra “dispuesto” ta laga espasio amplio pa interpretashon, den kòmbersashon ku e representante di Banko Sentral esaki a aklará bisando ku definitivamente lo NO kobra but na esnan ku kaba di paga òf likidá nan fiansa promé ku tempu.

Mi tin ku sigui paga mi fiansa/hipotek?
Si. Bo tin ku sigui paga bo fiansa/hipotek segun términonan akordá den bo akuerdo di fiansa/hipotek.
Pa kuantu tempu mas mi por paga mi fiansa na Girobank NV promé ku mi tin ku transferí pa un otro banko?
Si bo tin un fiansa na Girobank NV, e kliente ta responsabel pa kaba di paga esaki. No opstante e sirkunstansianan di Girobank NV, e kliente tin e deber di kaba di paga e fiansa kompletu. Si un kliente ta transferí pa un otro banko, e ta keda responsabel pa kaba di paga su fiansa.