WILLEMSTAD.- E luna aki a marka komienso di e promé Luna di Edukashon Finansiero organisá pa Centrale Bank van Curaçao en Sint Maarten (CBCS). Den kuadro di esaki, CBCS ta kolaborando ku Fundashon Negoshi Pikiña (FNP) en bista di e ekspertisio, eksperensia i éksito di e organisashon akí riba tereno di edukashon finansiero i lantamentu di empresa. E luna aki, e meta ta pa papia mas ampliamente posibel riba tema relashoná ku finansa personal, ku atenshon spesial pa outosufisiensia finansiero den komunidat. Tambe lo para ketu na e importansia di CBCS pa nos sistema finansiero i pa komunidat en general. Durante Luna di Edukashon Finansiero, di dia 1 te ku dia 30 di novèmber, lo organisá evento pa alumno di skol di fundeshi i skol sekundario, studiante, empresario i públiko general. Den e promé dos simannan, lo tene lèsnan interaktivo na diferente skol di fundeshi, presentá pa personal di CBCS. Algun tópiko lo wòrdu tratá ta: (1) e evolushon di sèn (e.o. merkado di interkambio i e importansha di sèn), (2) e funshon di sèn (modo di interkambio, spar, i konta), (3) e funshon di CBCS (e.o. e diferensha entre un banko sentral i un banko komersial) i (4) sèn ta hasibu felis? E charlanan aki ta forma parti di e proyekto mas amplio “Nos Komunidat” di FNP, den kual vários empresario, empleado i mayornan di mucha ta duna charla. Den e di tres siman di e luna aki CBCS ta sostené diferente aktividat den kuadro di Global Entrepreneurship Week (GEW), pa motibu ku edukashon riba nivel empresarial tambe ta parti di edukashon finansiero. Durante di e siman aki e skolnan di fundeshi ku a partisipá den e proyekto “Nos Komunidat” ta risibí nan sertifikado di partisipashon. Nietu di e legendario Nelson Mandela, señora Swati Mandela, tambe lo duna un diskurso inspirativo den e siman aki. Den e último siman di novèmber alumnonan di skol sekundario i studiantenan di universidat lo tene un debate.

E ponensianan riba kual nan lo debatí lo tin di haber ku: (1) ekonomia, (2) maneho empresarial i (3) edukashon finansiero. Alabes CBCS ta organisá un “webinar” ku koperashon di University of Curacao (UoC) tokante di konosementu finansiero i maneho empresarial. Durante di e “webinar 3” studiante universitario lo presentá resultadonan di investigashon, sigui pa un diskushon riba esaki ku otro studiantenan den region Karibense, Latino Amérika i Europa. Mediante e proyekto akí, CBCS ke hasi un kontribushon positivo na outosufisiensia finansiero i komportashon finansieramente responsabel den komunidat di Kòrsou i di Sint Maarten