WILLEMSTAD.- Banko Sentral di Kòrsou i Sint Maarten a intervení den e kampaña di e kompania Breakaway Global ku den forma ilegal ta ofresiendo oportunidatnan di invershon. E promoshon no tin aprobashon di Banko Sentral a base di e ordenansanan vigente. E leinan aktual ta bisa ku pa e tipo di aktividatnan aki mester di un pèrmit di Banko Sentral. Komo ku e instituto mes no tin masha espasio pa intervení, awor aki ta atvirtiendo klientenan. Loke ta remarkabel ta ku Banko Sentral a menshoná nòmber di tur esnan impliká. Banko Sentral a bisa ku e tipo di aktividatnan aki por afektá integridat di nos sektor finansiero.
Den pasado tambe Banko Sentral a atvertí pa diferente promoshon ku ta parse e sistema di piramit i a menshoná nòmber di kompanianan pero no a bai dje leu ei manera awor aki. A menshoná nòmber i e-mail di e persona ku ta tras di e kampaña aki i esnan asosiá kuné ku ta bende e produkto pa “Breakaway Global”

EXTRA a tuma nota ku riba entre otro Facebook te ayera nochi e kompania a sigui normalmente ku su promoshon. Awor aki ta klientenan mes mester tuma nota di e atvertensia di Banko Sentral i si algu pasa ku nan "oportunidat di invershon", nan no por akudí na Banko Sentral pa ningun reklamo.
Banko Sentral a bisa ku e persona ku ta tras di e promoshon aki ta Marvin Sambo. Ta publiká su dos e-mailnan ku e ta usa den e kaso aki i tambe wèpsait di e kompania. Su kolaboradornan tambe ta menshoná den e atvertensia. Nan ta Chariselle Sambo, Ramis Pietersz, Jenny Maria i Rudayma Helena.
"Banko Sentral a atvertí pa no drenta den e tipo di oportunidatnan di invershon di Marvin Sambo i esnan ku ta asosiá kuné komo ku e grupo aki ta operando violando e lei riba supervishon di institushonnan di invershon konosí komo NOSIIA. Nan no tin e outorisashon di Banko Sentral tampoko pa loke nan ta hasiendo", asina e instituto a bisa.
Ta parse ku e instituto awor aki, despues di tur e kosnan ku a pasa i ku a stroba funshonamentu di e instituto, ku e ta kla pa re-asumí su responsabilidat riba merkado ku un aktuashon firme. Den último lunanan diferente promoshon i sistema di piramit a subi merkado. Banda di esei ainda no a kaba di atendé e kaso di "loan shark" pa kua a anunsiá medidanan fuerte. E kantidat di luna di grasia ku a duna a pasa i bida ta sigui su kurso. Algun di e “loan sharknan” aki ta kobrando interes di mas ku 3500 porshento. Aparentemente nan a menasá ku un kaso den korte.