WILLEMSTAD.- Ayera abogadonan di e propietario di Ennia, Hushang Ansary i otro demandantenan Parman International B.V., Nina Ansary, Andraous Abdalla i Ralph Palm, a entamá un proseso kontra di Ennia pa por haña mas informashon tokante dje kaso ku Ennia a inisiá kontra di nan.
E abogadonan ke a haña akseso na diferente informashon di manera ku nan por kuminsá traha riba nan nota di defensa. Ayera por a tuma nota di presensia di sr. Jose Jardim di Banko Sentral den sala di korte huntu ku abogadonan di Ennia, komo tambe abogadonan di Ansary i otro demandantenan den e kaso aki entre otro Ralph Palm. Apesar ku tabatin desishon di korte den pasado pa Ansary ta presente durante tratamentu di e kaso aki, e situashon di e pandemia di COVID a impedí esaki. Sinembargo esaki no a kita ku sr. Ansary for di New York por a sigui e kaso aki di forma virtual. Hues a hasi uso di un traduktor p’asina tradusí na ingles pa sr. Ansary ku a kere primeramente ku tratamentu di e kaso ku Ennia a entamá kontra di dje ta andando. Hues mester a splika sr. Ansary ku esei no te kaso.
Loke a hala atenshon ta ku sr. Jose Jardim di Banko Sentral a anunsiá den sala di korte ku nan lo bini ku un demanda di 845 mion na daño kontra Ansary i otronan.
Despues di a tende partidonan, hues a indiká ku pa mas tarda den e di dos mitar di yanüari 2021 e lo dikta sentensia den e kaso di petishon pa haña akseso na diferente informashon. Tambe hues lo elaborá den e sentensia si tin kualke posibilidat pa partidonan yega na un areglo riba e demanda den e kaso aki.
Ennia Caribe Holding N.v., Ennia Caribe Leven N.v., Ennia Caribe Schade N.V., Ennia Caribe Zorg N.V. i EC Investments BV a entamá un kaso kontra dje propietario di e kompania Hushang Ansary, i tambe ta kontra di Parman International B.V., Nina Ansary, Andraous Abdalla i Ralph Palm.
Ansary ku ta un mionario tin di responsabilisá su mes di a saka fondonan finansiero for di e kompania di seguro. Dor di e akto aki, for 2018 Banko Sentral di Kòrsou i St. Maarten a pone Ennia bou di areglo di emergensia.
Den kurso di añanan tras di lomba, pa medio di vários kaso na Merka, Banko Sentral a logra rekobrá bastante di fondonan ku Ansary a saka for di Ennia hiba riba su kuentanan den eksterior. Te ainda a keda un disputa riba balor di un tereno na Maho na St. Maarten.
Segun e “verzoekschrift” t’asina ku Ansary c.s. a saka plaka for di Ennia na tur forma posibel pa nan benefisio personal, manera entre otro repartishon di dividendo den su grupo ku ta koperá kuné. Di e forma aki Ansary c.s. a saka por lo ménos 223 mion florin for di Ennia.
Banda di esaki Ansary c.s. a enkargá Ennia ku gastunan astronómiko. Gastunan ku Ennia a paga ku defakto Ennia no tin nada di aber ku nan.
Gastunan manera, donashonnan di sumanan grandi pa obranan di karidat na Merka, gastunan sumamente haltu di konseheronan, salarionan eksesivo na personanan ku nunka a traha na Ennia ni tampoko a yega di duna servisio na Ennia, pero ta Ennia a paga.
E loke ku tambe ta remarkabel ta e sumanan di plaka ku a bai pa Komisarionan di Ennia ku a haña hopi plaka sin ta hustifiká. Tin gastunan di dos avion ku tabata keda usá pa Ansary su metanan priva, i otro tipo di gastunan ku ta di sumamente eksesivo.
Pues e akshonnan iresponsabel di Hushang Ansary a pone ku Ennia tin di dil ku un défisit di solvensia di mínimo 700 mion florin. Pues for di ayera pa Ansary ta konosí ku tin un demanda di 845 mion ta kologá riba su kabes.