WILLEMSTAD.- Banko Sentral tin komprenshon ku lo tin di tuma medida meimei di e pandemia aktual, pero di otro banda e tin di bisa ku mas e (semi) lockdown aki dura mas den pèrtá e ta hinka Kòrsou. Asina e instituto ta bisa den konklushonnan a base di un análisis ku el a hasi riba e efektonan makro ekonómiko pa Kòrsou.

Den su análisis Banko Sentral ta bisa entre otro ku, ne momentunan aki nos komunidat ta ser asotá gravemente dor di un di tres ola di infekshonnan di COVID-19. E variante Britániko a dal duru manera por nota for di e kantidat di kasonan aktivo, hospitalisashonnan i tambe víktimanan mortal. Pues medidanan preventivo stringente ta altamente nesesario pa por kombatí e ola aki.

Pero den e mesun rosea e ta rekordá ku aña pasá Kòrsou tabata relativamente eksitoso den limitashon den plamamentu di e vírus. Durante e promé ola na mart-aprel 2020 gobièrnu a tuma medidanan stringente kual a inkluí un lockdown kompleto di un seis siman i seramentu di fronteranan pa tres luna.

Banda di esei e medidanan preventivo a ser eskalá un biaha mas na fin di aña, aunke den forma limitá pa asina limitá tambe un di dos ola dje vírus.

Segun Banko Sentral, for di un perspektiva makro ekonómiko e medidanan aki a kondusí na un kontrakshon ekonómiko profundo i históriko. Segun e kalkulashon mas resien di Banko Sentral, ekonomia di Kòrsou a kontraé ku 19.9% na 2020.

Mas aleu e ta bisa ku, pa 2021 originalmente (promé ku e brote aktual) a kalkulá ku lo bai tin un kresementu moderá di 2.5%. Sinembargo e (semi) lockdown ku tabata inevitabel, un biaha mas lo bai tin efekto negativo riba e kresementu. Mas largu e (semi) lockdown aki dura, mas grave e efekto negativo lo ta, aunke e lo ta ménos grave ku na 2020, esei pa motibu ku e biaha aki ta dunando mas eksonerashon, miéntras ku fronteranan no ta será. Den kaso di un (semi) lockdown di 4 siman e kresementu lo tarda, siendo ku den kaso di un semi lockdown di 6 pa 8 siman lo kombertí e kresementu den un kontrakshon.

Finalmente Banko Sentral ta bisa ku, finansa di gobièrnu ya tabata bou di preshon promé ku e aktual lockdown. Pero dor di e situashon aki di parti di komersio i hendenan individual lo bai hasi apelashon mas grandi ainda riba gobièrnu pa haña sosten finansiero. Pero esaki lo empeorá e finansa di gobièrnu aun mas.

E eksperensia for di 2020 ta mustra ku sosten di likides for di Hulanda ta algu inevitabel pa por konfrontá e krísis aktual. Pero Banko Sentral ta apoyá e programa di vakunashon ku a start kuné for di febrüari, pa asina por logra imunidat den grupo mas lihé posibel i e aktividatnan ekonómiko duradero lo por reanudá atrobe.