WILLEMSTAD.- Relashoná ku publikashon di un artíkulo den EXTRA di djarason 25 di aprel, gerensia di Banko Sentral di Kòrsou ta Konfirmá e primisia aki.  Nos ta sita “Op (2)5 april 2018 is een bericht in de media verschenen over het feit dat er afluisterapparatuur is gevonden binnen het Bankgebouw. Dit is door de Directie van de Bank bevestigd”.

Banko Sentral ta splika ku nan a laga hasi un investigashon riba e prekupashon di trahadónan ku nan yamadanan por a keda skucha den pasado. Segun gerensia di Banko Sentral e aparatonan ta skucha yamada i tambe ta blòkia yamadanan di drenta. Niun di e aparatonan ku a haña tabata aktivo i a kita nan. Gerensia di Banko Sentral ta sigui bisa ku nan ta hasi tur esfuerso pa garantisá seguridat i privasidat di trahadónan i di informashonnan ku ta konfia e banko kuné.

Di e forma aki Banko Sentral ta konfirmá e primisia di EXTRA di  “Jammers” ku a haña den e banko. EXTRA a risibí karta di abogado Mirto Murray na nòmber di su kliente eks direktor/presidente di Banko Sentral sr Tromp ku ta desmentí ku el a pone aparatonan den e banko. Den e mesun karta ei ta kalifiká EXTRA di ta difamá su kliente na numeroso okashon. Nos a kontesta sr Murray den un karta bek, teniendo na kuenta ku nos ta sigur di nos informashon/primisia i a práktika periodismo responsabel manera semper nos a hasi. Si no tabatin komentario di sr Tromp ta pasobra EXTRA no ta keda atendé i no ta haña kontesta di nos yamadanan den último añanan, ni ora topa sr Tromp personalmente por ehèmpel na trapi di Stadhuis.