WILLEMSTAD.- E siman aki mr. Etienne Ys den su kalidat di presidente i miembro saliente di e hunta di komisario di Banko Sentral a dirigí un karta ofisial na Hunta di Direktiva di e instituto. E karta aki tin karakter di un dokumento di despedida den kual e ta rekapitulá loke a sosodé den e kuater añanan di su reinado. E ta bisa di a asumí e funshon aki ku hopi plaser i satisfakshon, i huntu ku e personal di e banko el a sa di surpasá hopi opstákulo, i a dal pasonan grandi pa optimalisashon di e servisio di Banko Sentral.

Segun sr. Ys, kende a dirigí e karta tambe na nòmber di sr. Jeannette Hagen, sr. Dennis Richardson i Jean Francisca, kuater aña pasá na 2017 nan a bin topa ku un situashon difísil. E reputashon di Banko tabata bou di preshon pa algun aña kaba. Komo konsekuensia di e situashon ei gobièrnu a hasi un apelashon riba PriceWaterhouseCoopers Hulanda pa hasi un investigashon riba e faktornan ku lo ta stroba funshonamentu di e banko i ku ta tacha su konfiansa. E rapòrt ei a keda kla finalmente na 2014.

E preokupashonnan pa ku e Banko a keda i a alkansá su punto di mas malu na 2016 ora ku e Presidente di Banko dje tempu ei (Emsley Tromp) a keda akusá den diferente kaso penal komo sospechoso dor di Ministerio públiko. E reputashon di Banko a bin para mas aun bou di preshon, i asina e relashon ku partnernan manera bankonan sentral di Aruba i Hulanda a empeorá. Na 2017 na momentu ku e hunta di komisario nobo a sinta mester a tuma despedida di sr. Tromp, ya ku segun statutonan no por a permitié pa sigui den e funshon si tin deskonfiansa den dje. A restablesé e hunta di direktiva, miéntras ku e relashon ku Aruba i Hulanda a mehorá. Dor di e situashon nobo aki Banko Sentral a haña refuerso pa tratamentu di kasonan difísil manera Girobank i Ennia i tambe ayudo tékniko pa mehorashon di e funshon di supervishon.

Mas aleu sr. Ys ta splika ku a laga hasi un investigashon i evaluashon pa a yega na un struktura nobo di kompensashon. Dor di eliminashon di e pagonan eksesivo, e gastunan salarial total pa e Hunta di Direktiva a ser redusí ku 42%, miéntras ku kompensashonnan partikular ku tabata paga miembronan di hunta di komisario a ser eliminá.

Den e organisashon nobo tin tambe un estilo interno nobo ku nan ta kompletamente bou di impreshon. Miembronan di e hunta di komisario ta spera ku esaki lo tin mesun impakto den komunidat na momentu ku esaki ser lansá. Loke tambe ta pertenesé na e organisashon aki ta un struktura di kompensashon moderno pa e personal. E benefisio di mas grandi den e struktura nobo aki ta e transparensia i e konstrukshon salarial ku tin relashon ku e konosementu, habilidatnan i responsabilidatnan di e trahadó. Ku esaki tambe a krea e garantia pa un mihó maneho dje kresementu salarial. Ta importante pa informá ku Banko Sentral a partisipá den redukshon di gastunan salarial ku 12.5%.

Segun sr. Ys, finalmente a fiha un plan di ehekushon nobo pa hasi e maneho di invershon di Banko Sentral mas robusto. E interes abou, papelnan di balor di rendimentu abou, empeorá dor di e pandemia di COVID tin un efekto negativo riba e proyekshonnan di loke e invershonnan lo generá pa Banko. Ku e plan aki Banko lo por kambia e desaroyonan na su fabor i evitá ku gobièrnunan lo tin di kontribuí den posibel défisitnan di Banko Sentral.

Pues por mira bèk riba kuater aña fruktífero i partikular kaminda e organisashon a ser transformá kompletamente. Na 2017 tabatin hopi adelanto. Lamentablemente e adelanto aki a ser tapá un tiki dor di e sonado kasonan di Girobank i Ennia último añanan. Pero afortunadamente 99% di portadornan di un kuenta na Girobank a bini na remarke pa un pago kompleto di nan plakanan. Pero segun Ys, e ta spera ku e investigashonnan independiente pa aklará kiko a kondusí na e debakle di Girobank bini kla pronto i ku Banko Sentral lo saka siñansa for di e kaso aki.

I ku aplikashon di e areglo di emergensia hunta di direktiva a evitá ku e posishon di Ennia lo a sigui empeorá. Pero e kaso aki tambe lo yega na un solushon satisfaktorio i ku esnan responsabel lo duna kuenta i rason.