WILLEMSTAD/PHILIPSBURG – Banko Sentral di Kòrsou i Sint Maarten ta informa ku segun nan kalkulashon preliminar di kresementu ekonómiko pa Kòrsou i Sint Maarten apesar di deterioro di e kondishonnan eksterno, entre otro komo resultado di e inflashon persistentemente haltu, e kondishonnan di finansiamentu mas stringente i e efektonan indirekto di e guera na Ukrania, den 2022 e union monetario a sigui rekuperá di e pandemia di coronavirus.

Loke a sostené e kresementu tantu na Kòrsou komo na Sint Maarten ta un oumento fuerte den turismo di estadia. Danki na esei, Kòrsou a registrá un kresementu di PIB real di 5,9%, miéntras ku ekonomia di Sint Maarten a krese ku 5,1%,’ segun presidente di CBCS, Sr. Richard Doornbosch. Kompará ku e perspektiva anterior publiká na sèptèmber, a hisa e pronóstiko pa Kòrsou ku 0,4 punto porsentual, mirando ku e rekuperashon di turismo di estadia den e di dos mitar di 2022 tabata mas fuerte ku loke a antisipá.

Di otro banda a baha e pronóstiko pa Sint Maarten ku 0,7 punto porsentual debí na e rekuperashon ménos rápido ku loke a antisipá di turismo di estadia i di krusero, i e retrasonan den proyekto di konstrukshon, partikularmente di Princess Juliana International Airport i di e hospital.