WILLEMSTAD - Baoase Luxury Resort a klasifiká na e di 3 lugá entre e mihó ‘Resort Hotels’ di Karibe, Bermuda i Bahamas risibiendo e ‘Travel + Leisure World's Best Award 2024’. Ademas a klasifiká na di 84 lugá den e ‘Top 100 Best Hotels’ na Mundu. Esaki ta algu históriko pa Kòrsou debí ku ta promé biaha ta aparesé riba e plataforma prestigioso aki. E rekonosimentu aki ta rekonose Baoase komo un lider pa ku resortnan global, demonstrando e karisma, hospitalidat, i luho di e isla na mundu kompleto.

E rekonosimentu históriko aki ta trese vários benefisio pa Kòrsou. E premio ta elevá e profil di Kòrsou komo un destinashon di biahe di primera klase, atraé mas turista for di mundu henter i stimulá benefisio ekonómiko signifikante. Esaki ta inkluí oumento di entrada pa negoshinan lokal i kreashon di trabou. Ademas, ser rekonosí pa Travel + Leisure ta halsa e reputashon internashonal di Kòrsou komo un destinashon ku un turista no por keda sin bishitá. E rekonosimentu históriko aki tambe ta asentuá e kultura úniko, herensia i beyesa natural di e isla, stimulando interkambio i apresio kultural.

“Nos ta sumamente agradesido i honrá di risibí e ‘Travel + Leisure World's Best Award Top 3’ pa 2024," Thijs van der Valk, Managing Director na Baoase Luxury Resort a bisa. "E rekonosimentu aki no solamente ta reáfirma nos posishon entre e mihó resòrtnan di mundu, pero tambe ta marka un logro históriko pa Kòrsou, pasobra esaki ta e promé rekonosimentu di ‘Travel + Leisure’ pa nos isla. Nos ta inmensamente orguyoso di mustrá e enkanto i hospitalidat di Kòrsou riba un esenario global."