WILLEMSTAD.- Masha tempu a bira di mas pa bisa ku Kòrsou ta sushi. Di un forma indeskriminá i sin niun klase di bèrgwensa nos hendenan ta tira sushi tur kaminda. Pa kolmo e servisio ku mester sòru pa nos isla keda limpi konstantemente ta den problema i no ta kumpli ku su skema di dia.

Resientemente e bario di Koraal Specht tabata den notisia pa motibu di e kantidat di sushi ku dado momentu a ser kolektá riba un plenchi grandi. Ku yudansa di algun hende den komunidat e.o. algun parlamentario a logra limpia e plenchi aki. Pero no a dura ni dos despues ku deskonosínan manera un kos pa malu a disidí di tira algun saku di sushi na e mesun sitio ku a ser limpiá.

Ku esaki e habitante(nan) kier a mustra ku solamente limpia tereno no ta e solushon, sino ku mester bini ku algu di karakter mas permanente. EXTRA a komprondé ku atrabes di tempu Selikor a permití habitantenan pa tira sushi na gran eskala asina, i despues tabata pasa limpia e tereno ku loader i tira e sushinan afó, djis pa motibu ku e stashon di trasbordo ta djis serka. Pero esei ta kos di porko, sigur pa un servisio ku tin di promové limpiesa.

Pero a yega na un solushon temporal, ya ku pa medio di intervenshon di parlamentario Juniel Carolina a bin pone un baki grandi pa por tira sushi aden. Den tempu rekòr e baki a yena. Asina den futuro lo por sigui pone bakinan grandi pa habitantenan por depositá nan sushi i asina evitá ku ta deslusí pa motibu di sushi.

Koraal Specht no tabata un bario sushi, pero ku tempu el a bin deteriorá. Por ehèmpel un tereno di futbòl ku antes tabata bon usá, awe ta tur na yerba sin niun alma ta hasi uso di dje. Por parte esei tabata tambe konsekuensia di gueranan interno unda no tabata permití sierto gruponan di hasi uso di e tereno pa finnan deportivo.

Koraal Specht ta sklama pa yudansa, pa saka e bario su kara. Te ainda nos por mira bòrchi di proyektonan ku te awe a keda solamente riba papel sin nunka a keda ehekutá. Esaki tampoko ta duna muchu ánimo na habitantenan ku ta sinti nan mes defroudá.