WILLEMSTAD.- T’asina ku lider polítiko di K.E.M. sr. Michelangelo Martines, resientemente tabata di bishita den e humilde bario di Wishi i a kombersá ku diferente habitante. Habitantenan a trese dilanti serka su persona, ku e bario di Wishi ta sinti nan mes bandoná i te asta lubidá pa gobièrnunan di e último añanan i e gobièrnu aktual di MFK I PNP.
Habitantenan ta reklamá e infrastruktura i edifisionan den mal estado. Ketu bai ta eksistí kamindanan di tera, ku ta stroba mobilisashon tantu pa tráfiko i pa peatonnan di/den e bario. Na momentu di áwaseru ta difísil pa nan sali nan kas. Edifisionan den mal estado aki, ta daña bista panorámiko (horizonvervuiling) di habitantenan tur mainta ora nan spièrta i ta sòru pa pèster den e bario.
Un di e edifisionan aki ta, e ántes Kolegio Tula, ku ta situá den kurason di e bario di Wishi. Nunka mas, despues ku fenómeno di naturalesa a asotá Kòrsou i e bario, atenshon a ser pone pa drecha esaki, kaminda muchanan tabata haña siñansa i esnan analfabeto tabatin oportunidat pa siña lesa i skibi serka Fundashon Pro-Alfa di sra. Jenny Fraai. Ta tristu pa komprobá i lamentá, ku analfabetismo a sigui krese bou di habitantenan di Kòrsou!
Partido K.E.M. a mira kon e misa di Wishi, Hesus Miserikordioso/Santa Theresita a keda bunita i bon restourá, ku esfuerso i ayudo di boluntarionan i e pastor Julio Briceño.
Partido K.E.M., pa medio di esaki, ta urgi tantu gobièrnu di Kòrsou i tambe doñonan di e bario pa asumí i karga nan responsabilidat, pa laga drecha situashonnan di infrastruktura i e edifisionan den mal estado den e bario di Wishi.
Partido K.E.M. ta di opinion, ku habitantenan i e bario di Wishi meresé mihó atenshon i ta spera, ku riba término kòrtiku, por mira trabounan kuminsá den e bario di Wishi. Awor ta e ora, pa kumpli ku promesanan hasi na habitantenan i e bario di Wishi.
