Aeropuerto a haña CMC si ainda no

WILLEMSTAD.-Aqualectra a kuminsá duna barionan na Kòrsou koriente atrobe, asina direktor Darick Jonis a duna di konosé un ratu pasá. Manera EXTRA a informá den oranan di mainta a surgi un problema basta serio ku suministro di koriente ku a pone ku hinter Kòrsou a keda sin koriente.

Banda di problema tékniko ku a surgi den e mashinnan, e kompania a konfrontá e echo ku no tin sufisiente personal. Covid a afektá Aqualectra tambe.

E direktor a bisa den oranan di mainta ku lo hasi esfuerso pa duna koriente na áreanan vital promé manera hospital i aeropuerto. Mas lat el a splika ku na momentu ku duna aeropuerto koriente di mes e barionan pega ku aeropuerto tambe ta haña koriente. Meskos ta konta pa hospital. El e menshoná ku den kaso di e dos klínikanan di Advent, na momentu ku nan haña koriente e barionan den nan serkania tambe ta haña koriente.

Pa loke ta trata barionan, eseinan si no tin sekuensia ku nan ta haña koriente. Kada bia ku pone un mashin den operashon ta wak barionan pa duna koriente natural ta dependé grandura di e bario. Importante ta tene balansa entre suministro i demanda.

Hospital CMC

EXTRA a chek ku Curaçao Medical Center i te 3:20 pm CMC tabata drai kompletamente riba nan propio generator. Esaki ta keda asina te na momentu ku Aqualectra por garantisá koriente stabil, asina e bosero sra. Gibbs a duna di konosé. CMC lo por funshoná pa 1 siman stret si esei ta nesesario. Di tur manera nan lo sigui monitor e situashon di koriente.

Aeropuerto

Pa loke ta trata aeropuerto nan a  haña koriente kasi 4’or. Un ratu promé EXTRA a papia ku e bosero sra. Haseth kende a bisa ku asina koriente bai outomátikamente nan ta bai riba generator, pero esei ta solamente pa e ekiponan mas esensial. Te 3:30 pm ainda nan no a haña koriente. Di tur manera pa awor atardi aki aeropuerto tambe tin koriente.