Un preokupashon ménos pa Kòrsou awor ku ta mas alehá:

WILLEMSTAD – EXTRA komo medio responsabel a sigui ku un investigashon pa wak unda e barku Braemar ta situá awe mainta. Manera ta konosí tabatin basta preokupashon ku entrada di e barku aki na Kòrsou i seguidamente mas aun ora ku a determiná ku tabatin 5 persona abordo a tèst positivo pa e vírus di Corona. Den  e konferensia di prensa ayera, Dr. Gerstenbluth a indiká ku e barku lo ta den bisindario di Boneiru i sin destinashon pa motibu ku su base, Barbados ya a indiká ku nan lo no laga Braemar drenta nan haf.

Via di e sistema di sigui barku, EXTRA a bin tuma nota ku awe mainta, Braemar tabata situá na nort di Santo Domingo. Komo destinashon final tin Freeport Bahamas. No ta konosí si e barku a haña outorisashon di e isla aki pa yega einan. Un di e preokupashon mayó tabata ku si e barku keda den nos área i e personanan afektá ku Corona Vírus bira mas malu i mester interná den hospital, ku Kòrsou lo por a bai ninga e pashèntnan aki kuido médiko. Awor ku Braemar ya ta na nort di Sto. Domingo esaki ya no ta un asuntu di preokupashon mas pa Kòrsou.