WILLEMSTAD.- Ayera  mainta a drenta haf di Kòrsou un barku di guera merikano. Na mas okashon Kòrsou a yega di risibí barkunan di guera merikano na momentu ku nan ta den un periodo di sosiegu pa e tripulashon. Konsiderando e desaroyonan mundial di e invashon di Rusia riba Ukrania, e bishita ta lanta pregunta. EXTRA a tuma kontakto ku Konsulado di Merka na Kòrsou. Segun bosero Sady El Hage ta trata di e barku USS BILLINGS ku ta un Freedom Class barku Littoral Combat Ship (LCS-5) ku tin su base na Mayport Naval Station, Florida.

Barku

E barku ta bishitá Kòrsou pa promé bia. Pa e tripulantenan di USS BILLINGS e ta trata di un ‘liberty call’, ku ta nifiká ku nan por Sali for di e barku. Segun Sady El Hage e barku ta bishitá haf di Kòrsou pa gasolin, provisiones i e ‘liberty call.’

EXTRA tambe a puntra Konsulado di Merka si ta bèrdat ku USS BILLINGS a transferí tambe tres persona na Wardakosta di Kòrsou. Segun Sady El Hage ‘na e momento aki’ e konsulado no ta duna komentario riba esaki. Pa e motibu ei EXTRA a tuma kontakto ku Wardakosta di Kòrsou, pero nan ta bisa ku e ta trata di un kaso di  Wardakosta di Merka (US Coast Guard). Pa e motibu Wardakosta di Kòrsou no por komuniká tokante esaki. Bosero di Wardakosta di Kòrsou, Shalick Clement, no por konfirmá tampoko si persona a wòrdu transferí si òf no.

EXTRA tambe a pidi Curaçao Port Authority (CPA) pa tende si tin un motibu partikular di e bishita di e barku, pero e bosero kordial a splika ku nan no ta bisa nada komo ku ta trata di informashon konfidensial.

Algun tempu pasá e bishita di un barku di guera merikano na Kòrsou a kousa preokupashon serka un grupo di polítiko. Nan a konsiderá ku gobièrnu di Kòrsou no mester a permití e barku yega aki pasobra Venezuela lo por konsiderá esaki un aktuashon hostil dilanti di nan teritorio. E desaroyonan na e momentunan aki entre Venezuela i Merka ta parse di ta neutralisando, sigur si konsiderá kombersashon fruktífero entre funshonarionan merikano ku e presidente venezolano, manera e presidente Maduro mes a divulgá.