WILLEMSTAD.- E situashon di pais bisiña na kosta sur Venezuela ta sigui unu ku meresé hopi atenshon. For di siman pasá EXTRA ta na altura ku a sali un barku for di Curaçao Oil Terminal (COT) ku produkto pa otro destinashon i awe EXTRA por informá ku nos investigashon a mustra ku un di dos barku a sali for di COT i den e kaso aki e di dos barku a sali ku kombustibel pa Venezuela.
Pa algun tempu kaba tin informashon ta sirkulá den sentido ku partidonan embolbí lo pone beslag riba tur barku ku por tin produkto pa PDVSA, pa e motibu ei a hala nos atenshon ku barku a sali for di COT.
Den promé instansia a informá ku e barku lo tin komo destinashon Cuba, pero investigashon mas profundo a mustra ku no ta Cuba pero Venezuela. Ounke sumamente difísil pa haña esnan embolbí pa papia riba e asuntu finalmente EXTRA a haña e informashon ku basta luna kaba Curoil lo no ta kumprando produkto serka PDVSA. Na Venezuela tin skarsedat enorme di kombustibel i komo ku Curoil no ta kumpra di Isla a disidí na manda e produkto Venezuela. Esei ta loke ta pasando.
Na logá di kumpra lokal Curoil ta preferá pa kumpra den eksterior i manera e direktor a yega di splika den entrevistanan resientemente (red. den e kaso di diesel na Heintje Kool), ta kumpra serka un ‘broker’.
Instansianan ta splika ku ora Curoil kumpra serka Isla nan ta haña un areglo di pago di manera ku tin ménos preshon pa paga kompará ku ora kumpra riba merkado internashonal unda mester paga promé kaba pa haña produkto. EXTRA mester indiká ku e bosero kariñoso di Curoil a duna di konosé ku e ta bai buska e informashon pa asina EXTRA por trese e motibunan di e kompania lokal.
E preokupashon ta grandi pa e kumpramentu di produkto riba merkado internashonal, miéntras ku kompra lokal ta pone ku Refineria Isla komo empresa ta operá lokal i ta paga salarionan lokal, meskos ta paga hür di e refineria.
Curoil a invertí den algun barku manera e.o Red Majestic pa asina fasilitá den e proseso pa kumpra kantidat mas grandi i asina haña mihó preis riba merkado. Lo a pidi e kompania estatal pa presentá faktura, meskos ku ta hasi serka Bureau Telecommunicatie & Post pa asina Isla por “match” i duna mesun preis, sinembargo kombersashonnan riba e tereno aki no a sigui nunka mas.
Posiblemente ku Curoil i otro instansianan lokal lo tin masha bon splikashon dikon ta kumpra den eksterior, ounke e trahadónan di Isla i nan sindikato ta boga pa tene refineria habrí. Si e refineria ta dispuesto na “match” preis ta duna e posibilidat pa Kòrsou haña mihó tarifanan pasobra Curoil no mester saka divisa pa kumpra kombustibel i esei lo yuda mas ainda den nan esfuersonan grandi pa salbaguardiá e merkado lokal, e komunidat ku mihó preisnan i trahadónan Isla ta produsí pa nan komunidat.