WILLEMSTAD – E barku krusero britániko, MS Braemar ku a krea asina tantu konsternashon aki na Kòrsou a logra mara na Cuba awe. Despues ku e barku aki a bandoná Kòrsou dia 10 di mart último i ku a keda konfirmá aki ku 5 persona abordo tin e Corona Vírus, niun otro pais no kier a akseptá e barku aki mas . Aun mas preokupante tabata e echo ku ni Bahamas bou di kual su bandera e barku ta nabegá no a laga e barku drenta. Awe porfin e pesadia di e pasaheronan, tripulantenan i kapitan a finalisá na momentu ku e barku a mara den e puerto di Mariel na Cuba. Te ainda ta papia di sinku persona ku e vírus pero tin sospecho di mas ku 10 persona mas ku síntomanan.

E puerto di mariel ta situá komo 70 kilometer for di Habana for di unda e pasaheronan lo keda transportá pa aeropuerto Jose Marti i ku 4 buelo charter lo keda manda pa Gran Bretaña. Outoridatnan di e isla a outorisá e operashon di evakuashon a base di rasonnan humanitario. A sigurá ku tur e evakuashon lo bai bou di medidanan estrikto di seguridat.

Aktualmente na Cuba tin 10 kaso di Corona Vírus, kual un a bin fayesé, un italiano.

Dia 10 di mart tabata den haf aki

https://extra.cw/korsou-no-tabata-na-riesgo-pasobra-a-aktua-ku-koutela/