WILLEMSTAD.- Wardakosta ta sigui aktivo den nos teritorio. E barku di marina Zr.Ms.Zeeland a topa ayera djadumingu un barku ku tabata trek un ‘go-fast’ riba laman ganchu. A buska asistensia di e helikòpter di marina NH-90, pero for di e helikòpter por a nota kon a los e ‘go-fast’. Porsierto e ‘go-fast’ tabatin diferente bulto na bordo. Por a nota kon a kuminsá benta e bultonan for di e boto ku ta nabegá bou di bandera venezolano.

E bultonan tabata mara na blòki di manera ku mesora nan a bai profundidat di laman.

E tripulashon di Zr.Ms.Zeeland no tabatin pèrmit pa subi na bordo di manera ku e barku por a sigui ku su ruta. Un inspekshon di e ‘go-fast’ no  produsí nada i despues a senk e boto aki pa seguridat marítimo.