WILLEMSTAD.- Desishon a kai den Konseho di Minister awe mainta pa loke ta trata e destino di barkunan di fruta i Sha Caprileskade. Apesar ku anteriormente minister enkargá ku Desaroyo Ekonómiko dr. Steven Martina a informá ku lo bai studia otro plan pa e área na Sha Caprileskade i ku asta a kuminsá pensa pa laga desaroyá e área den unu unda hendenan ku produktonan lokal por bende, awe mainta den Konseho di Minister e desishon a keda ratifiká.

Algun siman pasa presidente venezolano Nicolas Maduro a disidí ku ta sera frontera ku Kòrsou, Boneiru i Aruba a base di supuesto trafikashon ilegal di oro i otro metalnan presioso di forma klandestino for di Venezuela. A base di esaki barkunan venezolano ku ta bin bende piská, fruta i berdura no por a bini e islanan aki mas. Meskos ta konta pa e konekshon aéreo.

Entretantu gobièrnu di Kòrsou a instituí un komishon ku ta studiando kiko ta mihó pa Sha Caprileskade. Ya kaba a kuminsá hasi limpiesa debí ku den tempu ku tabatin e barkunan venezolano na e sitio e parti higiéniko tabata laga hopi di deseá. Mas detaye den bo edishon di EXTRA mayan.