WILLEMSTAD.- For di den oranan di mardugá vários parti di Kòrsou ta hañando basta áwaseru. E último informe di Servisio Meteorológiko ta indiká ku periódikamente lo tin momentunan ku áwaseru i ku esaki ta dura ta mayan djaluna mainta. Tambe tin bos. Parti pariba di Kòrsou ta basta awa a kai te awor ku ta mèrdia. E temperatura máksimo lo alkansá 29 ºC i temperatura mínimo 23 ºC. Prinsipalmente den áwaseru por spera ráfaganan te fuerte; forsa 5 te 6 (31 te 50 km/ora, 17 te 27 nudo).

Pa loke ta trata e situashon general Meteo ta informá ku lo tin humedat asosiá ku un ola tropikal, awe mainta riba e parti ost di laman Karibe, ta sigui plama den nos área i okashoná oumento temporal di nubia ku lo kousa áwaseru riba diferente parti di nos isla i su bisindario. E situashon di tempu aki lo persistí tambe durante e promé parti di kuminsamentu di e siman nobo. Ademas di esei, prinsipalmente den áwaseru e fluho di bientu lo supla un poko mas fuerte.

Perspektiva te djamars mèrdia: 
Parsialmente nublá ku un fluho di bientu un poko mas fuerte. Despues di un wer práktikamente seku den djaluna mèrdia i anochi, posiblemente lo tin un otro rònt ku áwaseru durante di djamars mainta tempran.