WILLEMSTAD.- Inspekshon Ekonómiko ku kontròl riba kumplimentu Ekonómiko den Otrabanda. Di e kantidat di 8 establesimentu kontrolá solamente 1 tabata den kumplimentu. Despues di a risibí keho di parti di SKO (Sosiedat di Komersiantenan den Otrabanda) riba komportashon di algun komersiante den área di Otrabanda, Inspekshon Ekonómiko di MEO ku sosten di SBAB a realisá kontròlnan dirigí ayera djárason.

Durante e kontròl a para 2 operashon, miéntras 5 establesimentu a risibí atvertensia.
Un kiosko situá na Gallerosteeg, a risibí atvertensia pa tin músika ‘live’ duru. A ordená pa warda tur ekipo di zonido ku tabata poné pafó di establesimentu. Tambe e propietario a risibí 1 siman di tempu pa por kaba di atendé su proseso di pèrmit.

Un restorant situá na Concientiesteeg, a risibí atvertensia pa produktonan ku no tabata tin indikashon di preis. Tambe un snèk situá na Breedestraat, su operashon a wòrdu pará debí na vários okashon ku nan a risibí atvertensia pa no tin indikashon di preis riba gran mayoria di nan produkto, alimento i artíkulonan ku e ta bende.

Un tienda situá den Breedestraat, a risibí atvertensia pa krea fasilidat pa klientenan por sinta i hasi uzo di bebida na e lokalidat mes. A ordená e persona responsabel eliminá tur fasilidat pa sinta.
Otro bar/restorant situá den Concenstiesteeg, su operashon a wòrdu pará debí ku no ta disponé di un pèrmit ekonómiko, ni pèrmit di Horeca pa por ta den operashon. Miéntras un snèk situá na Sebastopolstraat, a risibí atvertensia pa produktonan sin indikashon di preis.
E úniko Bar/Restaurant situá na Breedestraat si tabatin tur kos na òrdu tabata OK.
Finalmente un negoshi situá na Breedestraat, a risibí atvertensia pa ta ubiká, buta i para bende su produkto i artíkulonan dilanti di su establesimentu na tal forma ku ta stroba pasashi di peaton.
Inspekshon Ekonómiko ta atvertié tur komersiante ku ta ubiká den sentro di siudat (Otrabanda i Punda) pa simplemente kumpli ku kondishonnan stipulá den nan pèrmit ekonómiko, i evitá inkombeniensia na momentu di kontròl. Miéntras ku ta aserkando último periodo di aña 2024, MEO a indiká di lo sigui ku kontròlnan dirigí.