WILLEMSTAD.- Duana i e Tim Multidisiplinario di MEO a konfiská bastante bòter di bebida alkohóliko ayera for di un minimarket na Hanenberg. Por papia aki di un lote di bebida alkohóliko ku a haña den dos kompartimentu na e minimarket.

Di akuerdo ku sr. Ronny Cornelis di MEO, siman pasá un kònteiner a keda hòrtá den área di Monte Carmelo. A base di un tep ku nan a haña a bai e minimarket i a topa ku dos kompartimentu yen yen di bebida.

Propietario di e minimarket a bisa ku e tin dokumento pa mustra ku el a kumpra e bibidanan, pero e no por a mustra outoridatnan esaki. Esaki a trese kuné ku Duana  a konfiská tur e bibidanan.

Duana a bai na e sitio ku un trùk bastante grandi pa konfiská e bibidanan.

Tabata e propietarionan i trahadó dje minimarket mes ku tabata yena e trùk ku e bibidanan.

Duana tin di hasi inventario, i naturalmente hasi investigashon.

Pa MEO i Duana ta hopi remarkabel ku un establesimentu asina chikí por tin un kantidat grandi di alkohòl.

A konfiská tur bebida alkohóliko pa mas investigashon. Si resultá ku e bibidanan ta prosedente di ladronisia, esaki por tin reperkushon serio pa propietario dje minimarket.