WILLEMSTAD.- E infekshon di bakteria ku ta hasi hende malu ta haltu na Kòrsou. Esaki ta bini dor di kome posiblemente e karninan infektá ku e bakterianan ku ta ser bendé den supermerkadonan. Un médiko mikrobiólogo a trese dilanti ku nan ta mira ku e bakteria di Selmonela, Listeria i Ecoli ta bini hopi dilanti serka hende. Hopi hende tin e bakterianan aki i hasta den nan sanger ora bai hasi tèst pasobra nan ta malu. Mucha tambe tin e bakterianan aki ku ta hopi peligroso. Otro punto ku a bin dilanti ta ku kisas e komementu di karni infektá ku e bakterianan ku ta hasi hende malu tambe por ta un dje motibunan ku hopi hende na Kòrsou tin problema ku tripa.

Tur esaki a bin dilanti ayera den presentashon di investigashon di karni ku Servisio Veterinario a realisá den 20 supermerkado na Kòrsou.

E stazjèr Inge Drost t’esun ku a kondusí e investigashon aki. A investigá etikèt, e karni i tambe higiena den e supermerkadonan. E loke ku a konstatá ku tin un grado haltu di kontaminashon di produktonan di karni den supermerkadonan.

Di akuerdo ku hefe di Servisio Veterinario drs. Arnold Dwarkasing ku e resultado di e investigashon no ta di “kanta makamba”. P’esei lo trata pa den un sistema di komunikashon pa yuda halsa e kalidat kon atendé ku produktonan den tantu supermerkado komo karniserianan. Tambe el a keda sorprendé ku tin tantu problema ku a keda detektá den e investigashon. “Nos no a spera esei”, el a bisa.

Drs. Dwarkasing a splika ku nan a atendé ku e supermerkadonan, kaminda a konstatá e kontaminashon, i nan lo sigui  hasi kontròlnan. Refiriendo na e investigashon di karni kaduká di dos aña pasá, el a bisa ku no por garantisá ku esaki ta sigui pasa na Kòrsou.

Hopi biaha despues di wikènt ta topa ku hendenan ku ta yega dòkternan ku ta malu i ta resultá ku ta kontaminashon di un dje bakterianan aki nan tin, pasobra a kome karni infektá.

Di otro banda un propietario di un supermerkado ku tabata presente pa sigui e presentashon, a pidi pa bin ku programanan di informashon pa e konsumidó tambe sa kon pa atendé ku karni ku nan kumpra. Pasobra nan ta kumpra e karni, no ta atendé bon, i pa despues akusá e supermerkado di a bende nan karni dañá. Por ehèmpel kumpra un karni pa bai laman kuné. Ta pone e karni sin a mariná esaki den djùg, huntu ku otro kos mas i kere ku tur e oranan ku a pasa ku e karni riba laman, ku esaki su estado ta keda bon. Esei no te kaso.
Pues un problema bastante grandi na Kòrsou, ku a laga tur hende den e sala despues di e presentashon, boka habrí.