WILLEMSTAD.- Poko poko pero sigur elekshon 2025 ta aserká. Den luna di desèmber aki partidonan mester kaba di hinka nan lista pa elekshon den otro. 24 desèmber 2023 ta sera registro di votadó i 23 yanüari tin entrega di lista. Den e kuadro aki tin mas i mas informashon ta sirkulá riba partidonan ku lo ke partisipá na elekshon i kandidatonan (nobo) ku lo ta riba lista.

Un di e nòmbernan mas notabel ku ta bai rònt na esun di Norbert George. Informashon ku EXTRA ta disponé di dje ta indiká ku e eks lider polítiko i miembro di Konseho Insular pa Partido Democraat a mustra interes pa subi lista di Partido Nashonal di Pueblo (PNP). Mas aleu por komprondé ku number 1, 2 i 3 riba lista di PNP lo ta e tres èks ministernan Ruthmilda Larmonie-Cecilia, Ornelio ‘Kid’ Martina i Ruisandro Cijntje.

Partido PAR djadumingu 24 novèmber a revelá vishon i direkshon nobo di e partido. E “rebranding” aki a bai kompaña pa desvelo di un bòrchi nobo riba fachada di sede di e partido na Fokkerweg i tambe introdukshon di un logo nobo. Banda di esaki por tende nòmbernan nobo ku posiblemente lo ta den e promé 10 kandidatonan riba lista manera èks kabesante di lista pa KUMUN, Luigi Faneyte i empresario Caprice Augusta.

Partido MAN pa mas ku 1 aña kaba ta trahando riba un kambio di rumbo. A drenta den un aliansa ku Partido PIN i lo partisipá na elekshon ku un lista kombiná, MAN-PIN. Lider polítiko Giselle Mc William lo enkabesá e lista siguí pa lider di PIN, Suzanne Camelia-Römer i Yael Plet komo number 3 riba lista. Mas nòmber ku ta sirkulá ku posiblemente por ta den e promé 5 kandidatonan riba lista ta presidente di sindikato NAPB, Thaïse Lo-A-Njoe. Tambe e lista kombiná a lansa un logo nobo. Intenshon ta ku den futuro e dos partidonan aki ta smèlt huntu i bira un solo partido nobo.

Rondó di MFK no tin mashá informashon. Loke por tende te ainda ta ku kos ta mustra ku posiblemente Jacintha Constancia lo ta bèk riba lista di MFK pa elekshon na 2025. Na 2021 e èks minister i parlamentario pa MFK no a partisipá na elekshon. Pregunta ta, unda ta bai posishoná Constancia mirando ku e lo ke tin un puesto prominente “verkiesbaar”. Number 1, 2 i 3 riba lista lo ta Gilmar Pisas, Javier Silvania i Charles Cooper respektivamente. Aparente Sithree van Heydoorn a bisa ku e aña aki e ke ta mas haltu riba lista kompará ku 2021 i lo ta mek riba puesto number 4.

MFK tin alabes presidente di parlamento, Charetti America-Francisca i lider di frakshon Gilbert Doran ku tambe, segun por komprondé, ke un puesto mas haltu posibel riba lista. Otro parlamentarionan alabes ke mantené un posishon ku ta duna nan posibilidat pa bolbe drenta parlamento.

Partido KEM tin asuntunan interno grandi ku mester resolvé. Lider polítiko i fundadó di partido, Michelangelo ‘Low’ Martines ta den aresto preventivo riba sospecho di trafikashon di droga i labamentu di plaka. Pa próksimo elekshon por mira alabes un kambio riba puesto number 2 di e lista di kandidato. E nòmber di Omar Gill ta bai rònt pa e puesto aki na lugá di Anthony Godett.

Partido Trabou pa Kòrsou tin otro problema. Despues di elekshon 2021 a surgi un disputa ken ta esnan ku tin derecho pa usa e nòmber ‘Trabou pa Kòrsou’. E disputa aki ta hungando ainda i tin e posibilidat ku aktual lider di frakshon i kabesante di lista na 2021, Rennox Calmes lo no por partisipá na elekshon 2025 ku e nòmber ‘Trabou pa Kòrsou’ mirando ku ta otronan a registrá e nòmber na Kámara di Komersio.

Un di e partidonan nobo ku lo trata na haña sosten pa partisipá na elekshon ta partido ‘Mihó Kòrsou’ di Gilbert Ricardo. Tin indikashon den seno di sierto partido polítiko ku miembro independiente di parlamento, Corine Djaoen-Genaro lo por subi lista di e partido. Djaoen-Genaro mes semper a bisa ku e lo no regresá den polítika.

Otro partidonan ku lo ke purba pa partisipá na elekshon ta Union i Progreso, Un Kambio pa Kòrsou i Partido Democraat. Di e último aki por komprondé ku tin un kambio di liderato na kaminda. Ounke ku e no a tuma un desishon definitivo ainda, èks promé minister Daniel Hodge ta den deliberashon pa bira presidente di partido i kisas asta alabes lider polítiko.