WILLEMSTAD.- Korte a deklará I.O.(37) liber di tur akusashon, despues ku fiskal a bisa ku no tin sufisiente prueba kontra di I.O.

Ministerio Públiko a akusá I.O. pa poseshon di 815 gram di kokaina, dia 4 di sèptèmber 2019. Riba e dia ei, polis tabata patruyando den bario di Kwartier, ora ku nan a mira e akusado pará un manera sospechoso.

Debí ku e akusado ta konosí pa polis komo bendedó di droga, e agentenan a disidí di  tene un kontròl riba arma i droga riba e akusado i un hòmber venezolano ku e tabata huntu kuné na e garashi.

Despues di a kontrolá e hòmbernan, polis a kontrolá den e outo ku tabata parti pafó. Den e baul di e outo, polisnan a haña un saku ku tabata kontené e kantidat di droga den dje. Debí ku e vehíkulo tabata di e akusado, nan a detené i e hòmber venezolano.

E akusado a deklará ku e no sa nada di e droga. El a duna di konosé ku e tin su garashi i ta hür outo. E outo ku polis a haña droga den dje tabatin dos dia pará, despues ku e klientenan a entreg’é.

Durante e tratamentu, e akusado ku a presentá den sala di korte, a bisa hues pa nan bai wak deklarashon di e venezolano, pasó el a atmití ku e ta esun ku a pone e droga den baul di e outo. Na momento ku fiskal a bai wak e deklarashon di e venezolano, el a mira ku bèrdat ku el a deklará na polis ku e ta esun ku a pone e droga den baul. E venezolano a deklará ku e ta traha komo mekániko pa I.O.

Un par di dia promé, un grupo di amigu venezolano di dje, a pidié pa warda e saku pa nan. Segun e venezolano, na promé instante e no tabata sa ku e saku tabatin droga aden. Dor ku e no tabata sa kiko òf unda e warda e saku, el a disidí di ward’é den e baul.

Hues Verbeek na su turno a bisa I.O. ku p’esei un akusado mester bin korte durante tratamentu di su kaso, pa e mes por splika kon tur kos a bai.

Segun hues, si e akusado no a presentá pa splika su parti, e lo a keda kondená pa poseshon di droga. Pero debí ku e tabata tei i bisa kiko  e otro akusado a deklará, e kaso a haña un otro buèlta.

Fiskal Girigoria-Hernandez a bisa  ku e no tin prueba legal i konvisente kontra di I.O. i p’esei ta deklar’é liber di tur kulpa.

Hues den su desishon a bai di akuerdo ku e demanda di fiskal i asina apsolvé I.O. di tur akusashon.