Konforme e plan nobo: Awasá lo bira pa artistanan ku ta pinta i músika

WILLEMSTAD. - Konforme e plan nobo, bendementu di ‘souvenir’ lo muda pa viadukto i Awasá lo bira pa artistanan ku ta pinta i músika, esaki Marktmeester sra. Dianne Schenk a duna di konosé na redakshon di EXTRA.

Ayera a notifiká bendedónan di ‘souvenir’ na Awasá ku nan no por sigui bende nan kosnan mas na e “stand” nan, pa motibu di deterioro, ku asta a bira peligroso.

Sra. Dianne Schenk a aserká Fundashon Plaza pa wak kon nan por yuda duna un man pa kita e “stand” nan for di den e área p’asina evitá lo peor. Mester bisa ku Fundashon  Plaza a reakshoná positivo riba e yamada.

Trabounan por kuminsá kasi inmediato, pero semper tin algun rekisito atministrativo ku mester keda reglá manera e pèrmitnan pa desmantelá i manera esakinan ta kla, trabounan di desmantelashon di henter e área lo kuminsá.

Esaki ta pone ku a splika e bendedó nan di ‘souvenir’ ku nan tin di muda temporalmente pa Sha Capriles Kade. E informe aki a sòru pa mal kontentu ayera bou di e bendedónan di ‘souvernir’, pa motibu ku nan ta di opinion ku muda bai Sha Capriles Kade, lo ta funesto pa nan. Awasá tin e moveshon di hende i entre otro turista krusero i tambe di hotèl ku ta kumpra kos serka nan.

P’esei ayera tabatin resistensia di parti di esnan ku ta bende nan ‘souvenir’ na e sitio.

E tim di inspekshon, Marktmeester, otro instansianan ku tabata presente a papia ku e hendenan aki, pero mester a tende tur sorto di kos.

E úniko solushon ku tin aktualmente ta pa muda pa Sha Capriles Kade temporalmente, te ora ku kaba ku tur e plannan ku tin pa e área di Awasá i tambe bou di viadukto.

Mester indiká ku e bendementu di ‘souvenir’ no ta bai bèk Awasá, pero nan lo bai bou di viadukto. Konforme e plan ku tin riba mesa pa ehekutá t’asina ku lo bai traha henter un proyekto pa benta di ‘souvernir’ bou di viadukto.

Manera menshoná e área di Awasá lo bira pa artistanan ku ta para i pinta i tokamentu di músika.