WILLEMSTAD.- Apesar ku tabatin hopi reto rònt mundu inkluso aki na Kòrsou e aña tras di lomba, bendedónan di klapchi ta satisfecho ku e manera ku benta a kana.

Tur hende sa ku e pandemia di COVID-19 tabatin su influensia kuné rònt mundu den tur sektor.Serka bendedónan di klapchi tambe esaki tabata e kaso. Mester a hasi hopi adaptashon i te asta e kantidat di bendedónan di vürwèrk a baha. Pero finalmente e benta a kana bon generalmente.

EXTRA a komprondé ku pa fin di e aña aki lo tin hopi kambio mundial pa ku benta di vürwèrk. Por ehèmpel lo no traha pagara grandi pa fin di aña i tampoko dònderbos, kual e último aki ya a eliminá fin di aña tras di lomba. Tur esaki a bini despues ku un di e fábrikanan prinsipal na China a keda sendé na kandela di forma intenshonal. E kandela aki a pone ku e fin di aña tras di lomba 8 pa 10 kònteiner a keda sin yega Kòrsou.

Pues Kòrsou a haña klapchi ménos meskos ku vários otro pais kual tambe a sinti e efekto.