WILLEMSTAD.- Stichting Monumentenzorg Curaçao a kuminsá ku benta di un parti di su monumentonan. For di djaluna tin seis kas i dos edifisio komersial na benta riba wèpsait di e fundashon. E sèn di benta lo yuda finansiá proyektonan di restorashon di monumentonan. Ta trata di proyekto nobo, pero tambe proyektonan ku a kuminsá kaba. E edifisionan na benta tur ta situá na parti wèst di brùg na Ser’i Otrobanda.  Aktualmente Monumentenzorg ta propietario di mas ku 120 edifisio monumental.

Ta promé bia den e kasi 70 aña di eksistensia di e fundashon, ku e ta bende edifisio riba merkado liber. Na un banda a bira aparente ku tin mas apresio pa monumento bou di públiko general, loke ta indiká ku tin kapasidat riba merkado pa tuma responsabilidat pa kuido i mantenshon duradero di e monumentonan aki. Na otro banda, hopi supsidio for di Ulanda a stòp na komienso di Pais Kòrsou diestres aña pasá, loke a pone ku e fundashon tin ku buska alternativa pa finansiá e trabou di restorashon. Stichting Monumentenzorg por mantené su portafolio ku entrada di hür, pero esei no ta kubri e gastunan di su meta prinsipal, esta restorashon di edifisio ku ta na peliger di bai pèrdí.

Aktualmente e deskripshon di e edifisionan na benta a keda publiká riba e wèpsait www.monumentenzorg.cw. E dos edifisionan komersial ta situá na L.B. Smithplein. Un di nan ta Villa Washington, ku den pasado tabata e residensia di ingeniero L.B. Smith, kende a diseñá Brùg di Ponton. E otro ta La Armada, un edifisio elegante, situá banda di Villa Belvédère. E kasnan residensial tur ta situá na Bonairestraat i Witteweg. Ta trata di kasnan modesto di un òf dos kamber di drumi. E preisnan di e edifisionan na benta ta varia entre 99 mil pa e kas di mas chikitu te 2,5 mion pa e propiedat mas grandi. E intenshon ta pa pone mas edifisio riba merkado den e aña benidero.

Monumentenzorg a inkorporá algun garantia pa evitá konsekuensianan indeseá ku por resultá for di e benta. Den e kontrato di benta ta stipulá ku e kumpradó nobo ta obligá di mantené e edifisio, i ku no ta pèrmití pa bende e edifisio denter di sinku aña. Den kaso ku ta trata di un kas – ta preferá bende e edifisio ku e meta pa e kumpradó mes biba aden.

Tur e edifisionan ku Monumentenzorg ta bai bende ta  restorá kaba. Sí ta asina ku algun di nan mester di un tiki atenshon, pasobra nan a para bashí pa basta ratu. Kaminda tabata posibel, den e proseso di restorashon a pone hopi atenshon pa mantené e detayenan original i e struktura históriko di e edifisio. Di e edifisionan grandi Monumentenzorg a kompilá un historia kòrtiku, pa asina e doño nobo por haña sa mas di e abitantenan anterior i historia di e kas.

Den e próksimo simannan Monumentenzorg lo pone e edifisionan na benta bou di atenshon di un públiko amplio via di su kanalnan di sosial media. Pa mas informashon tokante e edifisionan òf pa planiá un bishita di un edifisio por tuma kontakto ku info@monumentenzorg.cw.