WILLEMSTAD.- Ayera tabata e promé dia ku benta di vürwèrk a ranka sali. Manera ya tur hende sa, e pandemia di COVID-19 a pone ku mester a hasi adaptashonnan den tur área.

Pa benta di vürwèrk tambe esaki no tabata un eksepshon. Finalmente un total di 10 establesimentu a haña nan pèrmit pa bende vürwèrk, pero esaki mará na algun medida.

E aña aki lo no permití uso di vürwèrk riba kaminda públiko òf riba tereno propio den kuadro di seramentu di aña komo kompania òf organisashon. Tampoko ningun kompania komersial no por duna show di vürwèrk ya ku esaki ta trese aglomerashon lokual mester evitá aktualmente. Pa hotèl i lugá nan di hospedahe nan por tira vürwèrk solamente durante kambio di aña (00:00-01:00). Esaki mester sosodé riba tereno privá di e lokalidat i solamente pa wéspetnan registrá.

Mas aleu e tim di kontròl tambe a sali kaya for di un dia promé ku e benta inisiá pa asina kontrolá wak ku tur kos ta na òrdu promé ku benta ranka sali. Mayoria establesimentu tabatin puntonan ku mester a drecha promé ku nan por a kuminsá bende ayera.

Den transkurso di e próksimo dianan lo sigui kontrolá pa asina sigurá ku tur kos ta kana na òrdu tambe.