WILLEMSTAD.- Bestianan grandi na Bándariba i por sierto den otro áreanan ta un problema di basta tempu. A atvertí na diferente okashon pa e situashon aki pero no tabatin oido. Outoridatnan a hasi manera nan ta surdu i komunidat mester a mira kon bestianan manera baka, toro i buriku ta hasiendo diferente zona insigur. Tin biaha gruponan di kabritu i karné tambe ta krea e peligernan nesesario. Aparte ku nan ta destruí diferente kurá i plantashon, nan ta kana riba kaya tambe ku tur e konsekuensianan ku esei ta trese kuné.

Na diferente okashon por a tuma nota di e bestianan aki ku ta kana riba kaya buskando yerba pa nan kome. E sekura di último simannan a pone ku un biaha mas nan ta riba kaya. Hustamente siman pasá un habitante a atvertí na un emisora lokal pa e peliger serio ku e animalnan aki ta enserá. Na e okashon ei el a konta ku parti anochi e tambe a topa ku un toro ku a kana subi kaminda i a pone ku el a pèrdè kòntròl. El a sufri daño menor.

Den fin di siman tabatin e promé kaso di lamentá. Manera EXTRA ta informá den su edishon di awe, un outo a dal den un toro, lastra e animal ku despues su kachu a bai bora un dama ku tabata den un vehíkulo. E dama a pèrdè su bida komo konsekuensia di e aksidente serio aki. Awor aki e  doño di e animal mester bai karga e konsekuensianan di loke a pasa pasobra oviamente aki tin un falta di responsabilidat di parti di e doño ku no a tene su animalnan paden.

Prinsipalmente parti anochi e situashon aki ta unu peligroso. Resientemente EXTRA a tuma nota di un grupo di buriku den e área di Bándariba ku tabata pará riba kaminda grandi ku tur e peliger ku esei ta trese kuné. Esei ta un ilustrashon ku e situashon aki ta unu hopi serio. Di un banda tin hende kier kria bestianan grandi pero no tin bista riba nan. Nan ta lubidá ku e promé responsabilidat pa kuida e bestianan ta di e doño.

EXTRA no a menshoná e otro aspekto di e kaso kaminda e animalnan aki ta laga nan shushi atras na diferente parti, tin biaha serka di kurá di hendenan ku ta kuida nan lugá. Awor a bira e momentu pa tuma e medidanan nesesario pa wak kon ta atendé e situashon aki i pa atendé ku doñonan di e bestianan aki ku no ta tene nan animalnan paden.

Un persona a sugirí p a pone bòrchinan di alerta den áreanan kaminda e bestianan aki sa trafiká.

E dama ku a bira víktima di e aksidente aki ta Jacqueline Pieternella, un konosido persona di e bario di Seru Pretu/Jean Louis/Santa Catarina. E área kompleto ta lamentá morto di e dama dinámiko aki.