WILLEMSTAD.- SVB a kòrta supsidio pa Betesda hinkando e instituto den un situashon mas difísil ainda. I p’esei lo bai korte ku SVB, segun presidente di direktiva sra Shirley Martis Treurniet den deklarashon na EXTRA.

E presidente a bisa ku tur hende sa ku Betesda meskos ku kasi tur kas di kuido tin problema finansiero. I ku tantu aña sin indeksá e tarifa ya por imaginá ku e kos no ta kuadra.

Den nan kaso nan a lucha masha hopi. Nan ta wanta pa duna kuido e prioridat. No ta kuido pa hende keda drumi na kama pero e ta algu kompleto., Mester wak su kuminda, su seguridat, wak si ke pa e pashènt bai dilanti i si e no por bai mes e kuido mester ta ku e hende no ta haña mas komplikashon. E kuido ta eksihí un otro manera di mir’e.

I esei SVB no ta komprondé òf no ke komprondé i ni maske kuantu Betesda a skibi i papia i sinta masha hopi na mesa ku nan, te awor sra Martis Treurniet ta kere ku sea nan no ke òf no por komprondé loke Betesda ta splikando.

Betesda no por duna kuido ku NUL sèn. Un kuido ku ta paga 100 florin pe tantu aña pasa, el a bira kasi dòbel awor aki. Kuminda ta hopi karu.

E direktiva aktual ta pone dor di hues i nan tarea ta pa drecha e kuido su kalidat, efisiensia i seguridat pa e hendenan. Ta henter un plan pa drecha kalidat di kuido i p’esei dr Rog ta einan. Nan vishon ta pa drecha e kuido. Hopi hende ta mira Betesda komo un lugá pa bai benta un hende bieu i lag’e einan.  Pero malesa króniko i malesa ku ta duna konsekuensianan hopi bia ta edat haltu. En bèrdat e hende ta bai Betesda i ta keda te final. I p’esei Betesda a haña mal nòmber. Hende no ke bai Betesda pasobra nan tin mal nòmber i p’esei nan ke drech’e pa sigur 3 aña kaba.

Si no haña niun salida lo mester kòrta den e personal pasobra si saka 10 hende, no por sigui. Tin gastunan di personal, pero tin gastunan di hendenna ku tin di kome i bebe tambe. Ta henter un pakete di kostonan ku ta pone preshon riba e instituto. No ta solamente pa e kama ta paga pero tin gastunan figo ku tin di kumpli kuné.

Betesda a manda un karta SVB i huntu ta splika pueblo kiko ta pasando. Tambe nan ta kuminsá ku e pasonan hurídiko pasobra esaki ta e tòp pùnt ku bo ta yega i kòrta den kuido den 2 dia. Nan ta warda algun dia i ta bai korte ku SVB segun e presidente di direktiva di Betesda.