Betèsda ta konta ku koperashon di pueblo di Kòrsou

WILLEMSTAD.- Stichting Verpleeghuizen Curaçao (Verpleeghuis Betèsda) ta kuminsá ku su kolekta anual den luna mart 2022. Betèsda ta konta atrobe ku koperashon di hinter pueblo di Kòrsou den aña 2022.

Meta prinsipal di e kolekta ta na benefisio di e klientenan. E aña aki e kolekta ta pa rekoudá fondo pa por traha un espasio dor di pone un “overdekte” pa e klientenan por sinta huntu ku otronan i partisipá na aktividatnan.

E otro meta ta pa renobá e kushina, ku ta mas ku 30 aña bieu i ku ta den nesesidat pa renobashon.

Pa e kolekta di e aña 2022, tin buzonnan situá na diferente establesimentu na Kòrsou pa asina komunidat tin akseso fásil pa koperá ku Betèsda. Tambe e kolektantnan lo ta na diferente establesimentu pa risibí tur donashon nesesario. E sitionan lo keda anunsiá tur siman via ret di media sosial.

Di mes tin e posibilidat pa komunidat sostené Betèsda  hasiendo donashon via banko.

Ademas por hasi donashon mensual (via ‘standing order’) riba e siguiente kuenta di

banko: MCB 14936407

Por último tin e posibilidat èkstra pa komunidat hasi donashon, esaki ta nos portal di donashon digital.

Di antemano Betèsda ta gradisí tur instansia ku ta i ku a koperá pa e kolekta i tambe ta gradisí tur instansia òf persona ku ya a duna nan koperashon den kualke forma pa hasi e luna di kolekta 2022 eksitoso.

Betèsda ta pidi komunidat hinter pa sigui aportá na Betèsda, pasobra den Betèsda bida (di kada un di nos) ta sigui!