A pidi pa posponé fecha pa atendé ‘kortdurende zorg’

WILLEMSTAD.-Instituto Betesda debidamente ta kumpli ku kondishonnan di supsidio. Djabièrnè último minister Silvania a risibi un karta di Betesda. Den e karta aki ta pidi minister pa posponé e fecha riba kua mester duna kuenta i rason di e supsidio di 2 mion florin ku e instituto a risibi na yüni 2023. Ta un petishon a hasi na minister, i si minister disidí ku e kontesta riba e petishon ta no, anto Betesda ta bai bek segun e palabrashon i kumpli. Na palabra dr. Natasha Rog direktor di instituto di kuido Betesda den deklarashon na EXTRA.

E direktor a splika ku na oktober 2023 Betesda a risibi un karta di minister Silvania den kua ta proponé pa e instituto aki tuma ‘kortdurende zorg’, esei ta e kuido diferente ku un persona/pashènt tin mester despues di tratamentu den hospital. Betesda a reuní ku inspekshon di salubridat i a yega na akuerdo riba puntonan. Dia 20 di desèmber a palabra pa haña presupuesto pa ‘kortdurende zorg’. Teniendo kuenta ku esaki e instituto ta mira ku mihó haña klaridat promé riba e parti di ‘kortdurende zorg’ pasobra esei ta trese kuné ku e kantidat di kama di Betesda ta baha di 160 pa 120. E instituto ta kere mihó haña klaridat ya asina por hasi adaptashonnan konforme e nesesidat korekto.

Pues no ta asina ku Betesda no ta kumpli òf no ke kumpli, Betesda a pidi minister pa posponé e fecha ya asina por hasi tur adaptashon konforme e nesesidat a base di loke minister Silvania mes a proponé esta pa Betesda bai atendé ku ‘kortdurende zorg’. Si minister su kontesta riba petishon di Betesda pa posponé ta negativo e por djis komuniká esei i Betesda ta kumpli konforme e palabrashon.